विघटनविरुद्धको सुनुवाई शुक्रबार

११ जेठ, काठमाडौं । संविधानको धारा ७६(५) बमोजिम वहुमत सांसद्को समर्थन जुटाएका शेरबहादुर देउवालाई प्रधानमन्त्री नबनाई संविधान विपरित प्रतिनिधिसभा विघटन गरिएको भन्दै सर्वाेच्च अदालतमा हिजो परेको रिट निवेदन उपर आउने शुक्रबार सुनुवाई हुने भएको छ ।

प्रतिनिधिसभाका १४६ जना सांसद् सशरीर उपस्थित भई सर्वाेच्च अदालतमा दर्ता भएको रिटको सुनुवाई लामो नहुने संविधानका ज्ञाताहरुले बताएका छन् । यो रिटका सम्बन्धमा बढीमा दुई सातामा छिनोफानो भइसक्ने तर्क छ वरिष्ठ अधिवक्ता दिनेश त्रिपाठीको ।

उनी भन्छन्–अहिले त १४६ जना सांसद् नै सशरीर उपस्थित भएका छन् त्यसको परीक्षण गर्न भएपनि प्रतिनिधिसभाको बैठक बस्नै पर्ने हुन्छ ,त्यसैले धेरै समय नै लाग्दैन । यसअघि पुस ५ गते भएको पहिलो पटक गरिएको प्रतिनिधिसभा विघटनको रिटमा ६५ दिन सुनुवाई भएको थियो ।