खाद्यान्न र तरकारी पसलमा एकसाता पुरै बन्द गर्ने तयारी

११ जेठ, काठमाडौं । उपत्यकामा जारी निषेधाज्ञा एक साता थप्ने विषयमा तीनवटै जिल्लाका प्रमुख जिल्ला अधिकारीले सहमति जनाएका छन् । यसको औपचारिक निर्णय भने आजै साँझसम्म हुने भएको छ ।

अबको एक साता भने थप कडाई गरिने भएको छ । निषेधाज्ञा सुरु भएपछि कोरोना संक्रमणको चेनब्रेक गर्न सहज भएको अनुभव सबै प्रमुख जिल्ला अधिकारीहरुले गरेको भक्तपुरका सिडियाे प्रेमप्रसाद भट्टराईले नेपालबहस डटकमलाई बताए । उनका अनुसार अबको एक साता अझ कडाईका साथ पालना भयो भने उपत्यकामा संक्रमणको फैलावट नियन्त्रणउन्मुख हुनेछ ।

अब खाद्यान्न र हरियो तरकारी पसलमा हुने भीडभाड कम गर्न पूरै बन्द गर्ने भन्नेबारे छलफल भएको तर निर्णय भने भरे मात्र हुने जानकारी उनले दिए । हरियो तरकारी र खाद्यान्न पसललाई यही रुपमा चलाउने हो भने संक्रमणको चेन ब्रेक गर्न गाह्रो पर्ने उनले बताए ।

त्यसैले एक साता पूरै बन्द गर्ने सोच रहेको जानकारी उनले दिए । गएको वैशाख १६ गतेदेखि जारी निषेधाज्ञा पर्सि जेठ १३ गतेसम्म कायम छ ।