सबैको आँखा सर्वाेच्चतिर

११ जेठ, काठमाडौं । चुलिंदो राजनीतिक तरलताकाबीच राजनीतिक दलको ध्यान अब फेरि सर्वाेच्च अदालत परिसरतिरै सोझिएको छ । विपक्षी गठबन्धनले हिजो सर्वाेच्च अदालतमा दायर गरेको रिट उपर आउने शुक्रबारबाट सुनुवाई हुँदैछ ।

संविधानको धारा ७६(५) बमोजिमको सरकार बनाउन शेरबहादुर देउवाले वहुमत जुटाउँदासमेत राष्ट्रपति विद्यादेवी भण्डारीले प्रतिनिधिसभा विघटन गरेको विरोधमा विपक्षी गठबन्धनले रिट दायर गरेको हो ।

अब देशको राजनीतिले कुन दिशा लिन्छ भन्ने विषय सर्वाेच्चकै फैसलाबाट निर्धारण हुने देखिएको छ । यसका लागि दलहरुले आन्तरिक गृहकार्य अगाडि बढाउन थालेका छन् । खासगरी नेकपा एमालेको माधव नेपाल समूहले आफ्ना गतिविधि कसरी तय गर्ने भन्ने सन्दर्भ अदालतको फैसलापछि मात्रै निर्धारण गर्ने अवस्था छ । त्यसका लागि नेपाल पक्ष पर्ख र हेरको स्थितिमा रहेको छ ।

उता, प्रमुख प्रतिपक्षबाट सत्ताधारी बन्ने तयारीमा रहेको नेपाली काँग्रेस पनि भावी कार्यदिशा निर्धारण गर्न आन्तरिक छलफलमा जुटेको छ । पार्टीको १४ औं महाधिवेशनको समय घर्किसक्दासमेत प्रकृया अगाडि बढ्न सकेको छैन । यिनै विषयमा छलफल गर्न भोलि बिहान ९ बजे सभापति देउवाले आफ्नै निवासमा पदाधिकारी बैठक बोलाएका छन् ।

साथै, अन्य पार्टीले पनि आन्तरिक गतिविधि चलाइरहेका छन् । सत्ताधारी एमाले भने नेपाल पक्षलाई निमिट्यान्नै पार्ने अभियानमा जुटेको छ । ओलीलाई समर्थन नगरी देउवालाई गर्ने २३ जनालाई नै पार्टीबाट निष्कासन गर्न थालिएको छ । हिजो माधव नेपाललगायत ११ जनालाई निष्कासन गरिसकेको छ भने बाँकी १२ जनासँग पनि २४ घण्टे स्पष्टीकरण सोधिएकोछ । आजभोलि नै उनीहरुलाई पनि निष्कासन गर्ने तयारी ओलीको रहेको छ ।

उता, जनता समाजवादी पार्टी पनि आन्तरिक समस्यामै रुमलिएको छ । जसपाको ठाकुर–महतो समूह तत्कालै सत्तारोहण गर्न हतारिएको छ भने यादव–भट्टराई समूह कारबाही गर्ने प्रकृयामा अगाडि बढेको छ ।