बैंक तथा वित्तीय संस्थाले अब शेयर बजारमा १ वर्षभन्दा लामो अवधिका लागि मात्र लगानी गर्नुपर्ने

११ जेठ, काठमाडौं । नेपाल राष्ट्र बैंकले बैंक तथा वित्तीय संस्थाहरुलाई शेयर खरिद बिक्रीमा कडाई गरेको छ । केन्द्रीय बैंकले एकीकृत निर्देशनमा संशोधन गर्दै बैंक तथा वित्तीय संस्थाहरुलाई १ वर्षभन्दा लामो अवधिका लागि मात्र शेयर तथा ऋणपत्रमा लगानी गर्न पाउने व्यवस्था गरेको हो । निर्देशनमा भनिएको छ, ‘शेयर खरीद गरेको १ वर्ष पूरा भएपछि लगानी मध्येबाट १ आर्थिक वर्षमा प्राथमिक पुँजीको १ प्रतिशत रकमसम्म मात्र बिक्री गर्न सक्नेछन् ।’

तथापि, यसअघि लगानी गरेको भए २०७९ असार मसान्तभित्र बिक्री गर्न नयाँ ब्यवस्थाले रोक नलगाएको केन्द्रीय बैंकले जनाएको छ । यस व्यवस्थाले अब बैंक तथा वित्तीय संस्थाले शेयर बजारमा दीर्घकालीन लगानी गर्नुपर्ने भएको छ ।

यस व्यवस्थाले समग्र सेयर बजारकै स्थायित्वमा सकारात्मक भूमिका निर्वाह गर्न सक्नेछ । बैंकहरुले १ वर्षभन्दा बढी अवधिका लागि लगानी गर्नुपर्ने भएकाले बजारमा तीब्र उतारचढाव आउने क्रममा पनि सुधार हुने अपेक्षा गर्न सकिन्छ । किन भने सेयर बजारमा बैंक तथा वित्तीय संस्थाहरुको ठूलो लगानी रहेको छ ।

उनीहरुले नाफा बुक गर्न छिटोछिटो किनबेच गर्दा सेयर बजारमा छोटो समयमै तीब्र उतारचढाव आउने गरेको थियो । यस व्यवस्थासँगै यो समस्या समाधान गर्न केही हदसम्म सहयोग पुग्ने अपेक्षा गर्न सकिन्छ । साथै, अबदेखि विपन्न वर्ग कर्जामा गणना गर्ने प्रयोजनका लागि बाहेक लघुवित्त संस्थाको सेयरमा लगानी गर्न नपाइने व्यवस्था गरेको छ । यसअघि सेयर खरिद गरेको भए पुस महिनाभित्र बिक्री गरिसक्नु पर्नेछ ।

लघुवित्तको शेयर किन्न नपाउने निर्णय गरिए पनि आगामी पुससम्म बिक्री गर्ने समय दिइएको छ । लघुवित्तहरुको शेयर भोलुम कम भएको र पर्याप्त समय दिइएकाले यस प्रावधानले पनि दीर्घकालमा खासै असर नगर्ने अनुमान गर्न सकिन्छ । किन भने लघुवित्त कम्पनीहरुको शेयर बजारमा हिस्सा सानो छ । आपूर्ति पनि कम छ ।