जोखिम बढेपछि उपत्यकामा थप कडाइ, शुक्रबारदेखि खाद्यान्न पसल बन्द हुने

१२ जेठ, काठमाडौं । कोरोना भाइरस संक्रमण नघटेपछि काठमाडौं उपत्यकामा थप एक साता निषेधाज्ञा थपिएको छ । निषेधाज्ञा थप भएसँगै उपत्यकामा पर्सि शुक्रबारदेखि २० गतेसम्म खाद्यान्न पसलसमेत बन्द हुने भएका छन् ।

उपत्यकाका तीन जिल्ला काठमाडौं, ललितपुर र भक्तपुरमा २० गते राति १२ बजेसम्म निषेधाज्ञा लम्ब्याउँदै प्रमुख जिल्ला अधिकारीहरुको बैठकले पर्सिदेखि एक हप्ता खाद्यान्न पसलसमेत बन्द गर्ने निर्णय गरेको हो ।‍

काठमाडौं उपत्यकामा पछिल्लोपटक थपिएको निषेधाज्ञा भोलि सकिदैछ । कोरोना संक्रमणको जोखिम बढेको निष्कर्षका साथ उपत्यकामा थप कडाइका साथ जारी गरिएको आदेश पर्सिदेखि लागू हुने प्रशासनले जनाएको छ । पर्सिदेखि एक हप्ता खाद्यान्नका पसलसमेत बन्द हुने भएकाले आज र भोलि नै खाद्यान्नको जोहो गर्न प्रशासनले आम नागरिकलाई आग्रह गरेको छ ।

एक हप्ताका लागि खाद्यान्न, किराना पसल र डिपार्टमेन्टल स्टोरसमेत बन्द हुनेछन् । तरकारी, फलफूल, मासु, डेरी, खानेपानी र ग्यास पसल भने बिहान ९ बजेसम्म खोल्न पाइने छ । यसअघि जारी गरिएका गाडीका पास खारेज गरिएको छ भने विकास निर्माणसँग सम्बन्धित गाडी सञ्चालनमा पनि रोक लगाइएको छ ।

यस्तै, बिहान बेलुकाको घुमघाम ‘मर्निङ र इभिनिङ वाक’ मा समेत रोक लगाइएको छ । जिल्ला प्रशासन कार्यालयले जारी गरेको आदेश उल्लंघन गरेमा कैद र जरिवानासमेत गर्ने निर्णय भएको छ ।