एक्विजिशनलाई अन्तिम स्वीकृती दिन सिटिजन्स र सिर्जनाले डाक्यो विशेष साधारण सभा

१२ जेठ, काठमाडौं । सिटिजन्स बैंक इन्टरनेशनल लिमिटेडले सिर्जना फाइनान्सलाई एक्वायर गर्ने प्रस्ताव विशेष साधारण सभामार्फत पारित गर्दैछन्।

यी दुबै कम्पनीले एक्विजिशनलाई अन्तिम स्वीकृती दिन जेठ २७ गते विशेष साधारण सभा डाकेका छन्। दुबै कम्पनीले आ–आफ्नो केन्द्रिय कार्यालयमा वेबिनारमार्फत सो सभा सञ्चालन गर्न लागेको हो। दुबैको सभा बिहान ९ बजे शुरु हुनेछ।

सभाले सिर्जना फाइनान्सको १०० कित्ता बराबर सिटिजन्स बैंकको ९५ कित्ता शेयर दिने गरी शेयर मूल्य अनुपात कायम गर्ने विशेष प्रस्ताव पारित गर्नेछ। त्यसैगरी, एक्विजिशनपश्चात सिटिजन्सको पूँजी वृद्धि हुने भएकोले सोही अनुसार प्रबन्धपत्र संशोधन गर्ने प्रस्ताव पनि पारित गर्नेछ।

विशेष साधारण सभा प्रयोजनार्थ सिटिजन्सले जेठ २१ गते एक दिन र सिर्जनाले जेठ १८ गते एक दिन बुकक्लोज गर्ने भएका छन्।