संसद भंग असंवैधानिकः नेपाल बार एशोसिएशन

१२ जेठ, काठमाडौं । नेपाल बार एसोसिएसनले प्रधानमन्त्री केपी ओलीको सिफारिशमा राष्ट्रपति विद्यादेवी भण्डारीले गरेको प्रतिनिधिसभा विघटन असंवैधानिक भएको ठहर गरेको छ ।

बारले आज विज्ञप्ति जारी गर्दै यस्तो ठहर गरेको हो । नेपालको संविधानमा गरिएको व्यवस्था विपरित आफ्नो अनुकूल हुनेगरी अपव्याख्या भएकोले त्यसलाई सर्वाेच्च अदालतले फेरि प्रष्ट्याइदिनुपर्ने अवस्था आएको पनि विज्ञप्तिमा उल्लेख छ ।

संविधानमा भएको व्यवस्थाविपरित जेठ ८ गते मध्यरातमा गरिएको प्रतिनिधिसभा विघटन असंवैधानिक भएकाले तत्काल सच्याउने काम गरिनुपर्ने उल्लेख गरिएको छ । यस्तो असंवैधानिक कदमले संवैधानिक सर्वाेच्चता, विधिको शासन र मानव अधिकारसमेतको हनन भइ संविधान नै संकटमा परेको ठहर पनि बारले गरेको छ ।

संविधानको धारा ७६(३)को प्रधानमन्त्रीले राजीनामा नदिई ७६(५)मा जान नसक्ने भन्दै त्यस्तो सरकारले गरेको सिफारिश बमोजिम प्रतिनिधिसभा भंग हुन नसक्ने पनि बारले प्रष्ट पारेको छ ।

जनप्रतिनिधि संस्था भंग गरेर अध्यादेशबाट शासन चलाउने प्रधानमन्त्री ओलीको चाहना रहेकाले त्यसका विरुद्ध सर्वाेच्च अदालतले उपयुक्त निर्णय दिनुपर्ने पनि विज्ञप्तिमा उल्लेख छ ।