राष्ट्रपतिको कदम घोर अप्रजातान्त्रिकःदेउवा

१३ जेठ, काठमाडौं । नेपाली कांग्रेसका सभापति एवं पूर्व प्रधानमन्त्री शेरबहादुर देउवाले संविधानको धारा ७६ को उपधारा ५ बमोजिम आफूले वहुमत सांसद्को हस्ताक्षर बुझाउँदासमेत राष्ट्रपति विद्यादेवी भण्डारीले प्रधानमन्त्रीमा नियुक्त नगरी संविधानकै धज्जी उडाएको बताएका छन् ।

नेपाल प्रेस युनियनको स्थापना दिवसको उपलक्ष्यमा आज भर्चुअल संवोधन गर्दै सभापति देउवाले संविधानको धारा ७६(५) ले प्रतिनिधिसभाको कुनैपनि सदस्यले वहुमत जुटाउन सक्ने व्यवस्था गरेको स्मरण गराए । कतिपयले यो निर्दलीय अभ्यास भनेको सुनें ,त्यसो होइन, यस्तो आरोप लगाउनेले एकपटक संविधान पढ्नुपर्ने उनको तर्क थियो ।

प्रतिनिधिसभाका कुनैपनि सदस्यले विश्वासको मत पाउने भरपर्दाे आधार प्रस्तु्त गरेमा त्यस्तो सदस्यलाई राष्ट्रपतिले नियुक्त गर्नुपर्छ भन्ने प्रष्ट उल्लेख छ– देउवाले भने । गएको शुक्रबार देउवाले प्रतिनिधिसभाका १४९ सदस्यको हस्ताक्षरसहित राष्ट्रपतिलाई पत्र बुझाएका थिए । तर प्रधानमन्त्री केपी ओलीले भने दलीय व्यवस्था अनुसार आफ्नो पक्षमा एमाले र जसपाको सबै सांसद्को समर्थन रहेको भन्दै दाबा पेश गरेका थिए । राष्ट्रपतिले भने दुबैको दाबी नपुग्ने भन्दै ओली सरकारले गरेको सिफारिशमा फेरि प्रतिनिधिसभा भंग गरेकी थिइन् ।

राष्ट्रपतिलाई शंका थियो भने पार्लियामेन्ट बोलाएर भेरिफाई गर्न सक्ने अवस्था थियो नि , तर त्यसो नगरी ओलीकै एकल सिफारिशमा संसद् भंग गरियो , यो घोर अप्रजातान्त्रिक र असंवैधानिक काम हो – देउवाले भने ।

राष्ट्रपतिकै गलत कामले गर्दा आज कोरोनाका बेला समेत देशमा राजनीतिक संकट आइलागेको भन्दै उनले यसको छिनोफानो सम्मानित सर्वाेच्च अदालतले यथाशीघ्र गर्ने विश्वास व्यक्त गरे । युनियनको आज ३१ औं स्थापना दिवस हो ।