संवैधानिक इजलाश गठनको गृहकार्य सुरु

१३ जेठ, काठमाडौं । प्रतिनिधिसभा भंग गर्ने पछिल्लो निर्णय बदर गर्न परेका सबै रिट भोलिबाट संवैधानिक इजलाशले हेर्ने भएपछि अब इजलाशमा को पर्लान् भन्ने जिज्ञासा धेरैमा परेको छ ।  प्रधानन्यायधीशको संयोजकत्वमा पाँच सदस्यीय इजलाश गठन गर्नुपर्ने नियम सर्वाेच्च अदालत सम्बन्धी नियमावलीमा उल्लेख छ ।

यसका लागि हाल १३ जना न्यायधीशहरुको नाम रोष्टरमा चढेको छ । तर कसलाई इजलाशमा राख्ने भन्ने निर्णय भने प्रधानन्यायधीशले गर्नेछन् ।  भोलिबाट प्रतिनिधिसभा विघटन सम्बन्धी ३० वटै रिट संवैधानिक इजलाशले हेर्ने गरी आजै राणाले आदेश गरेका छन् ।

आज १९ वटा रिट माथिको सुनुवाईका क्रममा यस्तो आदेश भएको हो । सर्वाेच्च अदालत स्रोतका अनुसार, यस सम्बन्धमा प्रधानन्यायधीशले गृहकार्य सुरु गरेका छन् । यस्तो गर्दा यसपाला भने उनले वरिष्ठतम न्यायधीशलाई इजलाशमा राख्ने छन् ।

हाल सर्वाेच्चमा वरिष्ठतममा क्रमशः राणा, दीपककुमार कार्की, मीरा खड्का, हरिकृष्ण कार्की र विश्वम्भरप्रसाद श्रेष्ठ रहेका छन् । ती मध्ये यसअघि राखिएका कार्कीले आफ्नो नाममा विवाद भएपछि बस्न अस्वीकार गरेका थिए । विवाद नहोस् भनेर प्रधानन्यायधीशले यस्तो निर्णय गर्ने सम्भावना रहेको स्रोतले बतायो ।