किन राजीनामा गर्नेः मन्त्री शाह

१४ जेठ, धनगढी । सुदूरपश्चिम प्रदेश सरकारलाई दिएको समर्थन फिर्ता गर्ने निर्णय गरेको नेकपा एमाले स्थायी कमिटी र प्रदेश कमिटीको निर्देशन संसदीय दलले अवज्ञा गरेपछि विकसित राजनीतिक घटनाक्रम रोचक बनेको छ ।

एमालेको माधव नेपाल पक्षको वाहुल्य रहेको प्रदेश संसदीय दलले अटेर गरेपछि हिजो मात्रै सरकारमा सहभागी मन्त्रीहरुलाई फिर्ता गर्न अर्काे निर्देशन दिइयो । तर मन्त्रीहरुले राजीनामा नगर्ने बरु मन्त्री थप्ने पहल थाल्यो । लगत्तै पार्टीले मन्त्रीहरुसँग २४ घण्टे स्पष्टीकरण माग्यो ।

स्पष्टीकरणबारे आफूहरुलाई कुनै आधिकारिक जानकारी नभएको मन्त्री प्रकाशबहादुर शाहले दिए । सोधेको रहेछ भने स्पष्टीकरण दिने पनि उनले प्रष्ट पारे । तर संसदीय दलले गरेको निर्णय नै आफूहरुका लागि आधिकारिक रहेको उनले बताए ।

नेपाल पक्षको यो निर्णयले माओवादी केन्द्रका मुख्यमन्त्री त्रिलोचन भट्टलाई ठूलो राहत मिलेको छ । तर एमाले भने यो प्रदेशमा प्रष्ट दुई धारमा देखिएको छ । प्रदेशसभामा एमालेको २५ सदस्य रहेकाछन् । जसमध्ये १९ जना नेपाल पक्षमा र ६ जना ओली पक्षमा रहेका छन् ।