ओलीविरुद्ध विपक्षी गठबन्धनको मोर्चाबन्दी मजबुत

१४ जेठ, काठमाडौं । राष्ट्रपति विद्यादेवी भण्डारी र प्रधानमन्त्री केपी ओलीको मनोमानी र निरङ्कुश चरित्र नसच्चिएसम्म विपक्षी गठबन्धनको मोर्चाबन्दी अझै मजबुत बनाउन दलहरु सहमत भएका छन् ।

ओलीविरुद्ध राजनीतिक तथा कानूनी लडाईं लडिरहेका दलका नेताहरुले यस्तो समझदारी बनाएका हुन् । स्रोतका अनुसार, गत जेठ ७ गते बिहान कांग्रेस सभापति शेरबहादुर देउवा निवासमा विपक्षी दलका नेताहरुले यस्तो समझदारी बनाएका हुन् ।

ओलीलाई सत्ताच्यूत गरेपछि राष्ट्रपति विरुद्ध पनि महाअभियोग लगाउने विषयमा समेत समझदारी कायम भएको छ । सर्वाेच्च अदालतले आफूहरुको पक्षमा फैसला नदिएको अवस्थामा आगामी दिन ओली विरुद्धको मोर्चाबन्दी अझै कसिलो बनाउने पनि बताइएको छ ।

आवश्यक प¥यो भने विपक्षी दलहरुको सहकार्य आउने निर्वाचनसम्म हुने पनि स्रोतले बतायो । गठबन्धनमा नेपाली कांग्रेस, नेकपा माओवादी केन्द्र, नेकपा एमालेको माधव नेपाल समूह , जनता समाजवादी पार्टीको उपेन्द्र यादव समूह र राष्ट्रिय जनमोर्चा नेपाल रहेका छन् ।