जुम्लाका स्थानीय तहमा अक्सिजनसहितको कोभिड अस्पताल

१४ जेठ,खलङ्गा । कोरोना भाइरसको दोस्रो लहर व्यापकरुपमा फैलिएपछि संक्रमितका लागि जुम्लाका स्थानीय तहले अक्सिजनसहितका कोभिड अस्पताल सञ्चालनमा ल्याएका छन् । यहाँका सात गाउँपालिकाले अक्सिजनसहितको कोभिड अस्पताल सञ्चालनमा आएका छन् । स्थानीय तहका कोभिड अस्पतालमा न्यूनतम तीनदेखि ३० अक्सिजन सिलिण्डरसम्म व्यवस्थापन गरिएको यहाँका स्थानीय तहका स्वास्थ्य शाखाले जनाएका छन् ।

जिल्लाको एकमात्र नगरपालिका चन्दननाथ नगरपालिकामा कर्णाली स्वास्थ्य विज्ञान प्रतिष्ठान नजीक भएकाले कोभिड अस्पताल सञ्चालन गरेको छैन । यहाँको गुठीचौर गाउँपालिकामा पाँचवटा अक्सिजन सिलिण्डर तयारी अवस्थामा राखिएका छन् । पच्चीस सिलिण्डर खरीद प्रक्रिया अघि बढाइएको गाउँपालिका अध्यक्ष हरिबहादुर भण्डारीले बताए ।

चिकित्सक र अक्सिजनसहितको कोभिड अस्पताल सञ्चालनमा ल्याएपछि ढुक्कसँग बिरामीको उपचार गर्न सकिने अवस्था रहेको उनले जानकारी दिए । अहिलेसम्म अक्सिजन दिनुपर्ने बिरामी भर्ना भएका छैनन् । बिरामी भर्ना लिनु परेमा पनि अक्सिजन अभाव हुन नदिइने उनी बताउछन् । लक्षणसहितका कोरोना संक्रमण भएका व्यक्तिको उपचारका लागि आवश्यक सामग्री र जनशक्ति तयारी अवस्थामा राखिएको छ । गाउँपालिकामा १० श्ययाको कोभिड अस्पताल सञ्चालनमा आएको छ ।

हिमा गाउँपालिकामा तीन, तिला गाउँपालिकामा तीन, सिँजा गाउँपालिकामा दुई र कनकासुन्दरी गाउँपालिकामा पाँच अक्सिजन सिलिण्डरसहित कोभिड अस्पताल सञ्चालनमा ल्याइएको हिमाका प्रमुख प्रशासकीय अधिकृत रणबहादुर बुढाले बताए । पातारासी गाउँपालिकामा अक्सिजन सिलिण्डर खरीद प्रक्रिया अघि बढाइएको गाउँपालिकाका अध्यक्ष लछिमान बोहोराले बताए ।

कर्णाली स्वास्थ्य विज्ञान प्रतिष्ठान शिक्षण अस्पतालले यहाँका हरेक स्थानीय तहमा एक एक चिकित्सक खटाइने जनाएको छ । यहाँका स्थानीय तहमा न्यूनतम २५ देखि अधिकतम ५० श्ययासम्मका आइसोलेशन सेन्टर निर्माण गरिएको जनस्वास्थ्य सेवा कार्यालयले जनाएको छ ।

जिल्ला कोभिड–१९ सङ्कट व्यवस्थापन केन्द्रले अक्सिजन अभावलाई दृष्टिगत गर्दै अक्सिजन बैंक स्थापना गर्ने जनाएको छ । सहयोगी निकायबाट प्राप्त हुने अक्सिजन र खाद्यान्नको बैंक बनाएर केन्द्रको निर्णयबमोजिम वितरण गर्ने निर्णय गरिएको जिल्ला प्रशासन कार्यालयले जनाएको छ ।