देशभर साढे २ लाख बढी कम्पनी दर्ता, घरेलु उद्योगबाट औसतमा आधा दर्जन रोजगार

१४ जेठ, काठमाडौं । चालु आर्थिक वर्षको पहिलो आठ महिना (गत फागुन) सम्ममा देशभरमा दर्ता भएका कम्पनीहरुको संख्या साढे दुई लाखभन्दा बढी पुगेको छ।

नेपालका सातवटै प्रदेशमा गरी कुल दुई लाख ५६ हजार चार सय ९३ वटा कम्पनीहरु दर्ता भएको अर्थमन्त्रालयले शुक्रबार सार्वजनिक गरेको आव २०७७/७८ को आर्थिक सर्वेक्षणमा उल्लेख छ।

कुलमध्ये बाग्मती प्रदेशमा सबैभन्दा धेरै ७१.४ प्रतिशत (१८३११९ वटा) कम्पनीहरु दर्ता भएका छन् भने कर्णाली यस मामलामा सबैभन्दा पछि रहेको छ । कर्णाली प्रदेशमा चालु वर्षको आठ महिनाको अन्त्यसम्ममा ३१०९ वटा (१२ प्रतिशत) मात्र कम्पनी दर्ता भएको तथ्यांक छ।

बाग्मतीपछि सबैभन्दा धेरै संख्यामा कम्पनी दर्ता हुनेमा क्रमशः प्रदेश १, लुम्बिनी, प्रदेश २ र गण्डकी छन् । सुदूरपश्चिममा पनि दुई प्रतिशतभन्दा कम कम्पनी दर्ता छन् ।

साना उद्योग चार लाख ७६ हजार, एउटा घरेलु उद्योगबाट ६ जनालाई रोजगारी

यस्तै, गत फागुन अन्तिमसम्ममा नेपालभरमा कुल चार लाख ७५ हजार ६ सय ७७ वटा लघु, घरेलु तथा साना उद्योग दर्ता भएको तथ्यांक आर्थिक सर्वेक्षणमा उल्लेख छ।

यी साना उद्योगधन्दाहरुले कुल २९ लाख ७ सय ३९ रोजगारी सिर्जना गरेको जनाइएको छ। यसअनुसार एउटा घरेलु तथा साना उद्योगबाट औसतमा ६ जनालाई रोजगारी दिएको देखिन्छ।

घरेलु तथा साना उद्योग पनि बाग्मती प्रदेशमा नै सबैभन्दा धेरै दर्ता भएका छन् । गत फागुनसम्ममा दर्ता कुल यस्ता उद्योगमध्ये वागमतीमा ३३ प्रतिशत छन् । सोपछि क्रमशः लुम्बिनीमा १७ प्रतिशत, प्रदेश २ मा १४ प्रतिशत र प्रदेश १ मा १३ प्रतिशत घरेलु तथा साना उद्योग दर्ता भएको तथ्यांक छ । कर्णाली प्रदेशमा सबैभन्दा कम ५ प्रतिशत मात्र साना उद्योग दर्ता भएका छन् ।