चुनाव स्वतन्त्र र निष्पक्ष हुँदैन भन्ने हल्ला अत्यन्त निराधार: ओली

१५ जेठ, काठमाडौं । प्रधानमन्त्री केपी ओलीले चुनाव स्वतन्त्र र निष्पक्ष हुँदैन भन्ने हल्ला अत्यन्त निराधार रहेको बताएका छन्। गणतन्त्र दिवसको अवसरमा नेपाली सेना, जंगीअड्डामा आयोजित कार्यक्रममालाई सम्बोधन गर्दै प्रधानमन्त्री ओलीले आवधिक निर्वाचन लोकतन्त्रको आधारभूत पक्ष भएको बताएका हुन् ।

निर्वाचनले जनादेशलाई पुनर्ताजगी गर्नुका साथै निर्वाचनपछि बन्ने सरकारलाई सुदृढ बनाउन जनअपेक्षाअनुसार काम गर्न उत्प्रेरित गर्ने भन्दै उनले कात्तिक २६ र मंसीर ३ गते दुई चरणमा आम निर्वाचन घोषणा भएको स्मरण गरे ।

‘गणतन्त्र दिवसको यस अवसरमा सरकार निर्वाचनमा जानुपर्ने अवस्थाको सिर्जना आज कसरी भयो भनी स्पष्ट गर्नु सान्दर्भिक ठान्दछु,’ उनले भने, ‘मुलुकको अमूल्य समयलाई यस्तो अकर्मण्यता र अनुशासनहीनतामा खेर जानबाट रोक्न जनतासँग ताजाजनादेश माग्नु एकमात्र विकल्प हुन पुग्यो।’