विपक्षी नेताहरु बूढानिलकण्ठमा

१६ जेठ, काठमाडौं । सरकारले हिजो मात्रै संविधान र स्थापित मूल्यमान्यता विपरित अध्यादेशमार्फत बजेट ल्याएपछि कसरी अगाडि बढ्ने भन्ने सन्दर्भमा छलफल गर्न विपक्षी दलका नेताहरु बुढानिलकण्ठमा भेला भएका छन् ।

नेपाली कांग्रेसका सभापति शेरबहादुर देउवा निवासमा नेताहरुबीच गहन छलफल सुरु भएको छ । छलफलमा कांग्रेस सभापति देउवा, माओवादी अध्यक्ष पुष्पकमल दाहाल प्रचण्ड, एमाले नेता माधवकुमार नेपाल र जनता समाजवादी पार्टीका अध्यक्ष उपेन्द्र यादव तथा डा. बाबुराम भट्टराई सहभागी छन् ।

प्रतिनिधिसभा विघटनविरुद्ध सर्वाेच्चमा जारी सुनुवाईले दिन सक्ने फैसला र त्यसपछिको राजनीतिक कार्यदिशा निर्धारण गर्न छलफल आयोजना भएको बताइएको छ । केपी ओली नेतृत्वको सरकार जति लामो रह्यो देशले त्यति नै बढी क्षति बेहोर्नुपर्ने ठहर नेताहरुको रहेको छ ।

पछिल्लो समय कांग्रेस सभापति देउवासमेत यस्तै सोच बनाउनेमा परेका छन् । जेठ ७ गते वहुमत सदस्यको हस्ताक्षरसहित सरकार गठन गर्ने दाबी गरेका देउवालाई ओलीले छिर्के हानेपछि उनको विचार बदलिएको छ ।