ओलीको व्यस्ततापछि स्थायी कमिटी बैठक स्थगित गरियाे

१६ जेठ, काठमाडौं । नेकपा एमालेको आज बस्ने भनिएको स्थायी कमिटी बैठक स्थगित भएको छ । आज बस्ने भनिएको बैठक प्रधानमन्त्रीसमेत रहेका नेकपा एमालेका अध्यक्ष केपी ओलीको व्यस्ततापछि स्थगित भएको हाे ।

आज अपरान्ह ५ बजे बालुवाटारमा बोलाइएको बैठक सोमबार बिहानसम्मका लागि स्थगित गरिएको छ । समसामयिक विषयमा छलफल गर्न बाेलाइएकाे स्थायी कमिटी बैठक अब भोलि बिहान १० बजे बस्ने भएको छ ।

एमालेको अघिल्लो स्थायी कमिटी बैठकले विपक्षी दलका नेता शेरबहादुर देउवालाई प्रधानमन्त्री बनाउन हस्ताक्षर गर्ने विपक्षी एमालेका विरोध खतिवडा, जीवनराम श्रेष्ठ, घनश्याम भुसाल, सोमप्रसाद पाण्डे, कृष्णलाल महर्जन, झपट रावल, भवानीप्रसाद खापुङ, यज्ञ सुनुवार, सुरेन्द्र पाण्डे, मेटमणि चौधरी, दीपकप्रकाश भट्ट र नारायण खतिवडालगायतका १२ जना सांसदलाई स्पष्टीकरण माग गरेको थियो ।

यद्यपि उनीहरु कसैले पनि स्पष्टीकरण बुझाएका छैनन् । यता नेता घनश्याम भुसालले भने शनिवार फेसबूकमार्फत ‘मेरो स्पष्टीकरण’ भनेर आफू उल्लंघनमा पनि विकल्प रोज्नुपर्ने ठाउँमा पुगेको र नेपालीको आकांक्षा अनुसार संसदीय मर्यादाको उल्लंघन गरेको बताएका छन् ।

स्पष्टीकरणमा उनले कांग्रेस सभापति शेरबहादुर देउवालाई प्रधानमन्त्री बनाउन आफूले संसदीय मर्यादा उल्लंघन गरेको स्वीकार गरेका छन्। तर संविधान र राजनीतिका लागि आफूले त्यो विकल्प रोज्नुपरेको उनको भनाइ छ।

यसअघि विपक्षी एमालेका नेताहरु माधवकुमार नेपाल, झलनाथ खनाल, भीम रावल, रामकुमारी झाँक्रीलगायतका ११ जना नेतालाई पार्टीबाटै निष्कासन गरेको छ ।