कोरोनाको नक्कली औषधि बेच्ने ३५० जना पक्राउ

१७ जेठ, नयाँदिल्ली । भारतको राजधानी नयाँदिल्लीबाट कोरोनाको नक्कली औषधि बेचेको आरोपमा भारतीय प्रहरीले ३५० जनालाई पक्राउ गरेको छ ।

कोरोना भाइरस संक्रमणबाट बिरामी परेकाहरुलाई नक्कली औषधि बिक्री गरेको आरोपमा भारतमा ३ सय ५० जनाभन्दा धेरै पक्राउ परेका हुन् ।

प्रहरीले उनीहरुलाई सामाजिक सन्जाल प्रयोग गरेर कोभिड बिरामीलाई नक्कली औषधि र स्वास्थ्य सामग्रीहरु बेचेको आरोपमा पक्राउ गरेको भारतिय सञ्चार माध्यम अमर उज्यालाले जनाएको छ ।

प्रहरीले यस्तो ठगीलाई तल्लोस्तरको मानवताविरोधी अपराध भएको बताएको छ । कोरोना संक्रमणको दोस्रो लहरले भारत विश्वमै धेरै प्रभावित देशमध्ये एक हो ।

भारतमा बितेको चौबिस घण्टामा मात्रै कोरोना भाइरसका एक लाख ६५ हजार नयाँ संक्रमित भेटिएको ३ हजार ४६० जनाको ज्यान गएको तथ्यांक छ ।