राष्ट्रियसभा निर्वाचन: लुम्बिनी प्रदेशमा पनि उस्तै

१७ जेठ, काठमाडाैं । लुम्बिनी प्रदेशबाट राष्ट्रियसभाका लागि आज भएको निर्वाचन परिणाम कस्तो आउला ? धेरैको चासो रहेको छ । गएको जेठ ६ गते सम्पन्न बाग्मती प्रदेशकै इतिहास दोहरिएला कि नदोहरिएला भन्ने जिज्ञाशा धेरैमा रहेको छ ।

बुटवलमा जारी मतदान लगभग सकिने अवस्थामा पुगेको छ । केही प्रतिनिधिले बाहेक प्राय सबैले मतदान गरिसकेका छन् । साढे ३ बजेबाटै मतगणना सुरु हुने निर्वाचन आयोगले जनाएको छ ।

यो निर्वाचनलाई निकटबाट नियाल्नेहरु भन्छन्–इतिहास फेरि दोहरिनेवाला छ । अर्थात यहाँपनि नेकपा एमालेका तर्फबाट उमेदवार रहेका चन्द्रबहादुर खड्का पराजयको निकट देखिएका छन् । यस्तै, लुम्बिनी प्रदेशसभाबाट राजीनामा दिई काँग्रेसबाट उमेदवार बनेका दीर्गनारायण पौडेलले यहाँ पनि जित्ने लगभग निश्चित रहेको बताइन्छ ।

यो निर्वाचनमा बाग्मती प्रदेश जस्तो धेरै शक्ति सत्ता पक्षले खर्चेन । तर खड्कालाई जिताउन मुख्यमन्त्री शंकर पोखरेल भने कस्सिएका थिए । खड्काले एमालेकै मतदाताबाट मत पाउने अवस्था भने क्षीण देखियो । किनभने खड्का एमालेका नेता कार्यकर्ता नरही माओवादीबाट आएका र पदलोलुप हुन् भन्ने सन्देश प्रदेशमा फैलिएको छ ।

कांग्रेसका तर्फबाट उमेदवार रहेका पौडेललाई नेकपा माओवादी केन्द्र, नेकपा एमालेको माधव नेपाल समूह , जनता समाजवादी पार्टीको उपेन्द्र समूह र राष्ट्रिय जनमोर्चाको समेत सहयोग रहेको छ । आज साँझसम्म मत परिणाम सार्वजनिक भइसक्ने निर्वाचन आयोगले जनाएको छ ।