तत्काल चीनसहितका देशमा हवाइ उडान अनिश्चित

१७ जेठ, काठमाडाैं ।  सरकारले जेठ १८ गतेदेखि नेपालसँग नियमित उडान भइरहेका चीन, कतार र टर्कीका लागि नियमित उडान  तत्काल नहुने भएकाे छ ।  गत बिहीबारको बसेको मन्त्रिपरिषद बैठकले जुन १ अर्थात् जेठ १८ गतेदेखि कतारको राजधानी दोहा, टर्कीको इस्तानबुल र चीनका कुनै पनि स्थानमा दोहोरो अन्तर्राष्ट्रिय उडान खुला गर्ने निर्णय गरेपनि भोलि खुल्ने भनिएको चीनसहितका देशमा हवाइ उडान अनिश्चित भएको हाे ।

संस्कृति, पर्यटन तथा नागरिक उड्डयन मन्त्री भानुभक्त ढकालले एक साताअघि मन्त्रिपरिषद्बारा १८ जेठबाट तीन मुलुकका लागि नियमित हवाइ उडान खुलेको जानकारी गराएका थिए ।

तत्काल उडान खुल्ने निर्णय कार्यान्वयन गराउने निकाय नेपाल नागरिक उड्डयन प्राधिकरणमा अहिलेसम्म नपुगेपछि तत्काल नियमित हवाई उडान नहुने निश्चित भएको बताइएको छ । संस्कृति, पर्यटन तथा नागरिक उड्डयन मन्त्रालयका अनुसार उडान खुल्अन झै एक साता लाग्ने छ ।

क्वारेन्टाइन व्यवस्थापन, वायुसेवा कम्पनीलाई दिने उडान अनुमति संख्या लगायत विषयको टुंगो अझै लाग्न बाँकी छ । जसले गर्दा १८ जेठदेखि तीन मुलुकमा हुने भनेको उडान नियमित नहुने निश्चित भएको हो । नेपाल नागरिक उड्डयन प्राधिकरणका प्रवक्ता राजकुमार क्षेत्रीका अनुसार सोमबारसम्म उडान सञ्चालन गर्नेबारे कुनै निर्णय आएको छैन ।

सोमबार वा मंगलबार निर्णय आएपछि उडान व्यवस्थापन मिलाउन कम्तीमा एक साताको समय लाग्छ । सोही कारण एक साता तोकिएका मुलुकमा समेत नियमित उडान नहुने निश्चित भएको हो ।

उपत्यकका गत वैशाख १६ गतेदेखि निषेधाज्ञा सुरु भएको थियो। जेठ १४ गतेदेखि थपिएको एक साताको लकडाउन पनि थप कडा पारिएको छ। किराना पसलहरु पनि खोल्न दिइएको छैन। तरकारी पसलहरु बिहान ९ बजे मात्र खुल्छन्। अनावश्यक हिँड्ने पैदल यात्री र सवारीसाधनलाई जरिवाना गर्न थालिएको छ।