एक दशमलव ६० प्रतिशतले घटेको बजारमा करीब १४ अर्बको कारोबार

१७ जेठ, काठमाडौं । निरन्तर माथि उक्लिरहेको शेयरबजारमा आज सामान्य आज एक दशमलव ६० प्रतिशतले घटेको छ । एक दशमलव ६० प्रतिशतले घटेको बजारमा करिब १४ अर्वको कारोबार भएको हो ।

पछिल्ला दिनमा नेप्से २८०० विन्दुभन्दा माथि रहेको नेप्से परिसूचक, यस दिन सोभन्दा तल झरेको छ। जेठ ९ गतेदेखि नेप्से २८०० विन्दुभन्दा माथि बन्द भइरहेको थियो।

साताको दोस्रो कारोबार दिन नेप्से परिसूचक ४५.२५ अंक अर्थात १.६० प्रतिशत घटेर २७८२.६८ विन्दुमा बन्द भएको छ। त्यसैगरी, यस दिन सेन्सेटिभ इण्डेक्स १।३० प्रतिशत अर्थात ६.५८ अंक घटेर ५००.४७ विन्दुमा झरेको छ।

यस दिन नेप्सेसँगै कारोबार रकममा पनि अघिल्लो दिनको तुलनामा केही घटेको छ। यस दिन २१८ कम्पनीको १ लाख ४८ हजार ७१५ पटकको कारोबारमा १३ अर्ब ९० करोड ९१ लाख १३ हजार २९१ रुपैयाँ बराबरको ३ करोड ८ लाख ८८ हजार ६९५ कित्ता शेयर खरिदबिक्री भएको छ। अघिल्लो कारोबार दिन हालसम्मकै उच्च १७ अर्बभन्दा बढीको शेयर खरिदबिक्री भएको थियो।

कुन कुन कम्पनीको शेयरमूल्य सर्किट लेबलमा कारोबार

नेप्से ओरालो लागेपनि यस दिन दुई कम्पनीको शेयर भने सकारात्मक सर्किट लेभलमा कारोबार भएको छ। यस दिन राधी विद्युत कम्पनी र सेन्ट्रल फाइनान्सको शेयर सकारात्मक सर्किट लेभलमा कारोबार भएको छ। त्यस्तै, नारायणी विकास बैंकको शेयरमूल्य यस दिन ७ प्रतिशतभन्दा बढी बढेको छ।

यस दिन अधिकांश जलविद्युत कम्पनीहरुको शेयरमूल्य घटेको छ। शेयरमूल्य घटेका १० शीर्ष कम्पनीहरुमा सबै जलविद्युत कम्पनीहरु नै रहेका छन्। जसमध्ये बरुण हाइड्रोपावर शेयरमूल्य ९ प्रतिशतभन्दा बढी घटेको छ।

कुन कम्पनीको शेयरमूल्य घट्यो

कारोबार रकमका आधारमा यस दिन राधी विद्युत कम्पनी नै शीर्ष स्थानमा रहेको छ। सो कम्पनीको यस दिन ९१ करोड ८ लाख रुपैयाँभन्दा बढीको शेयर खरिदबिक्री भएको छ। कम्पनीले बोनस शेयरपश्चात हकप्रद शेयर निष्काशन गर्ने घोषणा गरेसँगै लगानीकर्ताहरु यसतर्फ आकर्षित भएका हुन्।

कुन उपसमूह बढ्यो र कुन घट्यो

कारोबारमा आएका १३ उपसमूहमध्ये यस दिन म्युचुअल फण्डबाहेक अरु सबै उपसमूहको परिसूचक घटेको छ। जसमध्ये जलविद्युत उपसमूहको परिसूचक सर्वाधिक ४.३१ प्रतिशत घटेको छ। त्यसैगरी, यस दिन व्यापार उपसमूहको परिसूचक ३.७९ प्रतिशत, निर्जीवन बीमाको २.५७ प्रतिशत, अन्यको २.४५ प्रतिशत, विकास बैंकको १.५४ प्रतिशत, उत्पादन तथा प्रशोधनको १.७७ प्रतिशत, जीवन बीमाको १.९३ प्रतिशत र बैंकिङ्गको १.०१ प्रतिशत घटेको छ।