कोपा अमेरिका फुटबल २०२१ अब ब्राजिलमा हुने

१८ जेठ, एजेन्सी। कोपा अमेरिका फुटबल २०२१ अब ब्राजिलमा हुने भएको छ । यसअघि आयोजकका रुपमा रहेका कोलम्बिया र अर्जेन्टिना दुवै आयोजकबाट हटाइए ब्राजिलले विश्वकै पुरानो फुटबल प्रतियोगिता आयोजना गर्ने भएको हो ।

दक्षिण अमेरिकी फुटबलको सर्वोच्च निकाय कन्मेबोलले सोमबार ४७औं संस्करणको कोपा अमेरिका ब्राजिलमा खेलाइने पुष्टि गरेको छ । सोमबारै कन्मेबोलले त्यहाँको अहिलेको अवस्थाका कारण अर्जेन्टिनालाई आयोजकबाट हटाएको थियो ।

अर्जेन्टिनामा अहिले कोरोना महामारी बढ्दो अवस्थामा छ । त्यसअघि कोलम्बियालाई पनि आयोजकबाट हटाइएको थियो । कन्मेबोलले कोपा अमेरिकाको मिति पक्का भइसकेको र भेन्यु र अल तालिका केही घण्टापछि सार्वजनिक गर्ने जनाएको छ ।

कोपा अमेरिकामा दक्षिण अमेरिकाका १० राष्ट्रले प्रतिस्पर्धा गर्नेछन् । ब्राजिल साविक विजेता समेत हो ।