राष्ट्रियसभा निर्वाचन परिणामले ओलीलाई झड्का, नेपाल फकाउने रणनीति

१८ जेठ, काठमाडौं । राष्ट्रियसभाका लागि भएका दुइवटा उपनिर्वाचनमा नेकपा ‘एमाले’ को संस्थापन पक्षले नराम्रो झड्का पाएपछि प्रधानमन्त्री केपी ओली गल्न थालेका छन् । वरिष्ठ नेता माधवकुमार नेपाल पक्षको असहयोगले बनेको यो परिस्थितिले आगामी दिन हुनसक्ने थप क्षति रोक्न ओली अलि संवेदनशील देखिएका छन् । त्यसैले हिजो उनले नेपाल पक्षका दोस्रो पुस्ताका नेताहरुसँग लामो छलफल गराएका छन् ।

हिजो राति करिब ४ घण्टा ओली पक्षका नेताहरु सुभाषचन्द्र नेम्बाङ, विष्णु पौडेल, शंकर पोखरेल र प्रदीपकुमार ज्ञवालीले नेपाल पक्षका घनश्याम भूषाल, सुरेन्द्र पाण्डे, योगेश भट्टराई र गोकर्ण विष्टबीच होटल याक एण्ड यतिमा छलफल भएको थियो ।

छलफलमा सहभागी एक नेताका अनुसार, पार्टी संरचनालाई जेठ २, २०७५ मा लैजान अब ओली पनि लचकदार देखिएका छन् । आपसी फुटले गैर बामपन्थीहरुको जित हुने त अब प्रष्टै भएको भन्दै दुबै पक्षले निकट नेतालाई सहमत गराउने सहमति भएको पनि उनले बताए । सोही अनुरुप ओली पक्षले आज स्थायी कमिटीको बैठक राखेको छ । हिजो राति भएको छलफलबारे ब्रिफिङ गर्ने ओली पक्षका नेताहरुको तयारी छ ।

नेपाल पक्षलाई साथ नलिंदा हुनसक्ने क्षतिलाई ध्यान दिएर अब ओली पनि एक कदम पछि हट्ने सम्भावना रहेको देखिएको छ । दोस्रो तहका नेताहरुले गरेको प्रयासलाई नेता नेपालले राम्रो मानेका छन् । तर उनी अझैपनि ओली प्रवृत्तिसँग त्रस्त छन् । आज बिहान आफू पक्षबाट वार्तामा सहभागी नेताहरुको ब्रिफिङ सुनेका नेता नेपालले ओली अफ्ठेरो अवस्थामा पुगेकाले मात्रै यस्तो चाल चल्न खोजेको आशंका गरेको स्रोतले बताएको छ ।

ओलीको रणनीति भनेको हामीलाई कमजोर बनाउने नै हो भन्दै उनले सर्वाेच्च अदालतले संसद पुनस्थापना गरेपछि फेरि अल्झाउने उद्येश्यले यस्तो पासा फ्याँकेको हुनसक्ने उनले बताएका थिए । अहिले नै ओलीसँग कुरा मिल्ने स्थिति नभएको भन्दै नेता नेपालले सर्वाेच्च अदालतको फैसलापछि मात्रै सही रुपमा त्यसको मूल्याङ्कन हुन सक्ने धारणा राखेका थिए ।