प्रधानन्यायधीश राणा र सर्वाेच्च बार पदाधिकारीबीच छलफल हुँदै

१८ जेठ, काठमाडौं । संवैधानिक इजलाशको गठनबारे वरिष्ठ वकीललगायत नागरिक समाजबाट व्यापक आलोचना भएपछि सर्वाेच्च अदालतका प्रधानन्यायधीश निकास दिन सर्वाेच्च बार एसोसिएसनका पदाधिकारीसँग छलफलमा जुटेका छन् ।

अहिले सर्वाेच्च अदालतमा सर्वाेच्च बारका पदाधिकारीसँग प्रधानन्यायधीश ज्यू छलफलमा हुनुहुन्छ– सर्वाेच्च अदालतका एक कर्मचारीले बताए ।बैठक भर्खरै सुरु भएको उनले जानकारी दिए । गत शुक्रबार चोलेन्द्र शमशेर राणाले पाँच सदस्यीय संवैधानिक इजलाश गठन गरेका थिए । जसमा दीपककुमार कार्की, आनन्दमोहन भट्टराई, तेजबहादुर केसी र बमकुमार श्रेष्ठ रहेका छन् । न्यायधीशद्वय केसी र श्रेष्ठको नाममा कानून व्यावसायी र नागरिक समाजले प्रश्न उठाएको छ ।

यसरी प्रश्न उठेपछि न्यायधीशहरु कार्की र भट्टराईले समेत चासो राखेका छन् । उनीहरुले विवादित भएर इजलाशमा नबस्ने धारणा राखेपछि प्रधानन्यायधीश राणा थप दबाबमा परेका छन् । यद्यपि विवादित न्यायधीशहरुलाई आफ्ना कुरा आज बस्ने इजलाशमै राख्न दिनुपर्ने पक्षमा उनीहरु सहमत छन् ।

तर प्रधानन्याधीश राणाले आजै बिहान एक्कासी सर्बोच्च बारका पदाधिकारीहरुसँग यसबारे छलफल गर्ने निश्कर्ष निकालेका हुन् । छलफलका लागि बिहान साढे १० बजेका लागि समय निर्धारण भएको थियो । तर बैठक भर्खरै सुरु भएको छ । यो बैठक सकेर मात्रै आजको इजलाश बस्ने भएकाले केही ढिला हुन सक्ने बताइएको छ ।