ओलीको न्यायालय र वकिलहरुप्रतिको टिप्पणी हारेको मानसिकताको उपज: शेखर

१८ जेठ, काठमाडौं । नेपाली कांग्रेसका नेता डा. शेखर कोइरालाले प्रधानमन्त्री केपी ओलीको न्यायालय र वकिलहरुप्रतिको टिप्पणी हारेको मानसिकताको उपज भएको बताएका छन् ।

ओलीले सर्वोच्च अदालतमा सुनुवाई जारी रहेका बेला बहसमा उत्रेका अधिवक्ताहरुमाथि आक्रोश पोखेपछि नेता कोराइरालाले त्यसको जवाफ फर्काएका हुन् । उनले सामाजिक सञ्जालमार्फत प्रधानमन्त्री ओलीले कानुन व्यवसायी र वकिलहरुले लोकतान्त्रिक आन्दोलनमा खेलेको भूमिका बिर्सेको आरोप लगाए ।

‘हामी सबै गणतन्त्रको आन्दोलनमा होमिंदा केपी ओली गणतन्त्रबारे वयलगाडा चढेर अमेरिका पुगिन्न भन्नुहुन्थ्यो,’ उनले भने, ‘तर ती सबै वकिलहरु कालो कोटमा हामीसँगै आन्दोलनमा र कतिपय त जेलमै थिए । आज ती वकिलहरुको मानमर्दन गर्दा उनीहरुको लोकतन्त्रप्रतिको निष्ठामा चोट पुगेको छ । कति चाडै बिर्सन सकेको उनीहरुको योगदान ?’

प्रधानमन्त्रीको न्यायालय र वकिलहरु प्रतिको टिप्पणी:
उनीहरुले लोकतान्त्रिक आन्दोलनमा खेलेको भूमिका विर्सेको मात्र नभई हारेको मानसिकताको उपज,लोकतन्त्रको उपहास, गणतन्त्रको अवमूल्यन,अधिनायकबादी व्यवस्थाको पूर्वाभ्यास र तानाशाह वन्ने चाहना।सजग बनौं, सबै क्षेत्रबाट सशक्त प्रतिकार गरौं।

— Dr Shekhar Koirala (@Shekharnc) June 1, 2021

तानाशाहहरुको पतन न्यायालयले गरेको उदाहरण प्रशस्तै रहेको भन्दै उनले त्यसलाई खोज्न अन्त जानु नपर्ने बताएका छन् । ‘हाम्रै देशमा सर्वोच्च अदालतले शाही आयोग खारेज नगरिदिएको भए आज नेपालमा गणतन्त्र आएको नहुन सक्थ्यो,’ नेता कोइरालाले भने, ‘पाकिस्तानमा तानाशाहीको पतन अदालतले नै गरेको कुरा यहाँ म प्रधानमन्त्रीलाई स्मरण गराउँन चाहन्छु ।’