लमजुङमा कोरोना बीच सुरक्षित प्रसूति सेवा

१८ जेठ,लमजुङ । लमजुङमा निषेधाज्ञा र कोरोना बीचमा पनि सुरक्षित प्रसूति सेवा सञ्चालन भईरहेको छ । सेवा लिनेहरुमा कुनै कमी आएको छैन । जिल्लामा निषेधाज्ञा जारी भएयता करीब २० दिनको अवधिमा जिल्ला अस्पतालमा हालसम्म ४५ जनाले सुरक्षित प्रसूति सेवा लिएको अस्पतालले जनाएको छ ।

अस्पताल प्रमुख हेमन्त श्रेष्ठका अनुसार सुरक्षित प्रसूति सेवा लिनेमध्ये एक जनाको जटिल किसिमको प्रसूति सेवा, आठ जनाको शल्यक्रिया र ३७ जनाको सामान्य प्रसुति सेवा लिएका थिए । संक्रमणको जोखिम बढिरहेका बेला समेत यहाँ प्रसूति सेवा लिन आउनेको भने कुनै कमी नआएको अस्पताल प्रमुख श्रेष्ठको भनाइ छ ।

उनले भने, “यहाँ दैनिकजसो दुई/तीन जना महिला सुरक्षित प्रसूति सेवा लिन आइरहेका छन् । यस अस्पतालमै कोरोना संक्रमितहरु राखिँदै आएतापनि संक्रमणको डर नमानी उनीहरु सुरक्षित प्रसूति सेवाकै लागि अस्तालसम्म आउने गरेका छन् ।” संक्रमणका कारण निषेधाज्ञा जारी भएयता अस्पतालको बहिरङ्ग र अन्तरङ्ग सेवामा भने कमी आएको अस्पतालले जनाएको छ । अस्पतालका अनुसार अन्य जटिल शल्यक्रिया २३, मध्यम दुई र सामान्य ४१ जनाले सेवा लिएका छन् ।