ओलीको छटपटीभित्र लुकेको रहस्य र एकता बचाउ रणनीति

१८ जेठ, काठमाडौं । प्रतिनिधिसभा पुनस्थापनाको छनक देखिएपछि प्रधानमन्त्री केपी ओली फेरि असन्तुष्ट पक्षलाई समेट्ने नाटक मञ्चन गर्न थालेका छन् । त्यसैको प्रतिक्रिया स्वरुप आज बालुवाटारमा बसेको एमाले स्थायी कमिटी बैठकले एकता बचाउन अन्तिम अवस्थासम्म प्रयत्न गर्ने निर्णय गरेको छ ।

तर भित्री कथा भने अलग छ– वरिष्ठ नेता माधवकुमार नेपाल निकट एक नेताले भने । यदि साँच्चै ओली सकारात्मक र लचिलो थिए भने अस्ती गरेको कारबाही किन फुकुवा गरेनन् त ? उनको प्रश्न थियो । आज बालुवाटारमा बसेको ओली पक्षीय स्थायी कमिटी बैठकले थप १२ विघटित प्रतिनिधिसभाका सांसदलाई कारबाही भने गरेन ।

बैठकपछि प्रवक्ता प्रदीपकुमार ज्ञवालीले भने – सकेसम्म धेरै साथीहरुलाई मूलधारमै राख्ने हाम्रो प्रयास हो । त्यसैले पार्टी एकता बचाउन अन्तिमसम्म हामी प्रयास गर्ने छौं । ज्ञवालीले यति भन्दै गर्दा माधव नेपाललगायतका नेताहरुका सम्बन्धमा भने अहिल्यै कारबाही फिर्ता लिने निर्णय नभएको जानकारी दिए । उनले भने–विपक्षी दलका नेतालाई प्रधानमन्त्री बनाउन हस्ताक्षर गर्ने नेताहरुले आफूलाई सच्याएर आए त भइहाल्यो नि ।

ज्ञवालीको यो कुराले के बुझिन्छ भने माधव नेपाललगायत केही नेता बिनाको एमाले हाँक्ने सोच ओलीमा व्याप्त छ । हालै भएका राष्ट्रियसभा अन्तर्गतका दुई वटा उपनिर्वाचनमा ओलीले व्यहोरेको क्षति माधव नेपाल समूहकै असहयोगले भएको बुझेका छन् । त्यसैले क्षति कम गर्न मात्रै भएपनि यो समूहका प्रभावशाली नेताहरुलाई आफ्नो पक्षमा पार्न लागिपरेका छन् ।

हिजै मात्र ओलीले नेपाल निकट केही प्रभावशाली नेताहरुसँग आफ्नो पक्षबाट कुरा गराएका थिए । मध्यरातसम्म होटल याक एण्ड यतिमा भएको छलफल पनि लगभग यस्तै विषयमा केन्द्रित रह्यो । नेपाल पक्षमा रहेका नेताहरुलाई ल्याएर एक्ल्याउन पाए जस्तोसुकै अवस्थामा पनि आफ्नो बोलबाला हुने ओलीको ठम्याई छ ।

साथै, प्रतिनिधिसभा फेरि व्यूँतिने परिस्थिति निर्माण भएकाले पनि ओली अली बढी नै अत्तालिएका छन् । प्रधानन्यायधीश चोलेन्द्रशमशेर राणाले गठन गरेको संवैधानिक इजलाश विवादमा परेको र आजै मात्र वरिष्ठताका आधारमा इजलाश पुनर्गठन गर्न सहमत भएपछि ओली अझै त्रस्त बनेका छन् । वरिष्ठताका आधारमा इजलाश गठन हुँदा ओलीको सबै सेटिङले हावा खाने अवस्था आउने छ । कदाचित प्रतिनिधिसभा पुनस्थापना भयो भने नेपाल पक्षका सांसदहरुकै सहयोगले मात्रै ओलीको पद जोगिन सक्छ ।

अझै पनि उनले पुनस्थापना भएपनि संविधानको धारा ७६ (५) अनुसारको प्रक्रियाबाट बहुमत जुटाउने विश्वास गरेका छन् । त्यसका लागि उनले जनता समाजवादी पार्टीको बिद्रोही समूहको २० मत आफ्नो पक्षमा ल्याउने तयारी गरेका छन् । त्यसैले गर्दा ओली सकेसम्म थोरै मात्र सांसद नेपालसँग रहुन् भन्ने चाहन्छन् । लुम्बिनी प्रदेशबाट राष्ट्रियसभाका लागि हिजो भएको निर्वाचन परिणाम र जेठ ६ गते भएको बाग्मती प्रदेशको नियति अब नदोहरियोस् भन्ने नै ओलीको चाहना हो ।

ओलीले थालेको यो चलाखीपूर्ण कदमलाई माधव नेपाल पक्षले कसरी परास्त गर्ला त्यसैमा भावी राजनीतिको गन्तब्य निर्धारण हुने अवस्था छ ।