पार्टी विभाजन अध्यादेश ल्याउँदै प्रधानमन्त्री ओली

१८ जेठ, काठमाडौं । फेरि सत्ता संकटमा परेको देखेपछि प्रधानमन्त्री केपी ओलीले जनता समाजवादी पार्टीबाट अलग हुन महन्थ ठाकुर पक्षलाई सहज हुने गरी अध्यादेश ल्याउने भएका छन् । हिजो ओली र महन्थ पक्षबीच भएको लामो कुराकानीका क्रममा यस्तो सहमति जुटेको हो । गएको वर्ष बैशाखमा ल्याइएकै अध्यादेश फेरि ल्याएर महन्थ पक्षलाई पार्टी फुटाउन सहज हुने वातावरण तयार गर्न लागिएको हो ।

यसबारे जसपाकै अर्काे पक्षले जानकारी पाएलगत्तै आजै चारजना नेतालाई पार्टी सदस्यताबाट निष्काशन गरेको छ । जसपाको केन्द्रीय कार्यकारिणी परिषदको आज बसेको बैठकले ठाकुरसहित राजेन्द्र महतो, लक्ष्मणलाल कर्ण र सर्वेन्द्रनाथ शुक्ललाई निष्काशन गरिएको छ । अब उनीहरुको हैसियत सांसद रहने छैन । संसद पुनर्गठन भएको अवस्थामा ४० प्रतिशत सांसद जुटाएर पार्टी विभाजन गर्ने आधार तयार गर्न लागेका महन्थ पक्षलाई यसले झड्का दिएको छ ।

कदाचित संसद पुनस्थापना भयो भने उपेन्द्र यादव पक्षले गरेको कारबाही नै आधिकारिक हुने र निर्वाचन आयोगले त्यसैलाई मान्यता दिने भएकाले पनि महन्थ पक्ष डराएको छ । साथै, भोलि नै महन्थ पक्षले ओली सरकारमा सहभागिता जनाउने निर्णय समेत गरिसकेकाे छ । विभिन्न आठवटा मन्त्रालयसहित १० जनालाई मन्त्री बनाउने सहमति दुबै पक्षबीच हिजै जुटिसकेको छ ।

आज भएको कारबाहीले मन्त्रिमण्डलमा सहभागी हुने तयारी प्रभावित नहुने महन्थ पक्षका नेता राजकिशोर यादवले बताए । हामी आफ्ना अजेण्डा पूरा गराएर मात्रै सरकारमा जान लागेका हौं भन्दै उनले मधेसका माग पूरा गर्न सरकार हदैसम्म लचिलो रहेको पनि उनले बताए ।

सत्तामा गएपछि पनि हामीले संविधान संशोधन लगायतका विषयमा गृहकार्य गर्ने छौं – उनले भने । साथै, रेशम चौधरीको रिहाईका विषयमा समेत ओली सरकार आवश्यक प्रकृया थाल्न तयार रहेकाले अब सरकारमा जाँदा कुनै फरक नपर्ने उनले बताए ।