नेपाल पक्षलाई गर्न लागिएको कारवाही किन रोकियो, मिल्ला त विवाद ?

१८ जेठ काठमाडौं । सत्तारुढ दल एमालेभित्र देखिएको आन्तरिक विवाद मिलाउन दोस्रो पुस्ताका नेताहरुको सक्रियता बढ्दै गएको छ । जेठ ९ गते राती पनि प्रयासमा रहेका नेताहरु असफल भएपनि १७ गते साँझ पुनः त्यो प्रयासमा लागेका छन् ।

त्यही प्रयासका कारण आज बालुवाटारमा बसेको नेकपा एमालेको स्थायी समिति बैठकले कांग्रेस सभापति शेरबहादुर देउवालाई प्रधानमन्त्री बनाउन हस्ताक्षर गरेका माधव नेपाल पक्षका थप नेतामाथिको कारबाही तत्कालका लागि रोकेको छ । सहमतिका लागि प्रयास जारी रहेको भन्दै नेपाल पक्षका १२ जनामाथिको कारबाही रोकिएको हो ।

एमालेको विभाजन रोक्न जेठ ९ गते भएको अन्तिम प्रयास पनि असफल भएपछि माधव नेपालसहित ११ नेतामाथि कारवाही र १२ सांसदलाई स्पष्टिकरण सोधिएको थियो । जेठ ९ गते दोस्रो तहका नेताहरुले होटल याक एण्ड यतिमा भेला भएर एकता जोगाउने अन्तिम गृहकार्य गरेका भएपनि प्रधानमन्त्री केपी ओलीले प्रतिनिधिसभा विघटन गरेपछि नेपाल पक्ष शेरबहादुर देउवालाई बोकेर प्रधानमन्त्री बनाउन अदालतमा हस्ताक्षर गर्न गएको थियो ।

एमालेलाई फुटबाट रोक्न ओली पक्षबाट एमाले नेताहरु सुवास नेम्वाङ, विष्णु पौडेल र प्रदीप ज्ञवाली लागि परेका छन् । त्यस्तै, माधव नेपाल पक्षबाट गोकर्ण विष्ट, सुरेन्द्र पाण्डे, घनश्याम भुसाल र योगेश भट्टराई पनि त्यसैगरी जुटेका थिए । दुबै पक्षका ६ जना नेताहरुले होटल याक एण्ड यतिमा जेठ ९ गते चार घण्टा लामो अन्तिम गृहकार्य गरेका थिए । उनीहरुबीच साँझ साढे ५ बजेदेखि ११ बजेसम्म भएको छलफल र गृहकार्यमा अध्यक्ष ओलीले के गर्ने र माधव नेपाल पक्षले के गर्ने भन्ने मोटामोटी ड्राफ्ट नै तयार भएको थियो ।

तर, १० गते आइपुग्दा उक्त ड्राफ्ट काम नलाग्ने अवस्थामा पुग्यो । ९ गते रातिसम्मको यो प्रयास असफल भएसँगै अध्यक्ष ओलीले १० गते माधव नेपाल पक्षका ११ जना नेताहरुलाई पार्टीको साधारण सदस्यसमेत नरहने गरी निष्काशन गरे । बाँकी १२ जनलाई पनि २४ घण्टे स्पष्टीकरण सोधेका थिए । त्यसपछि विथोलिएको वातावरण सहज बन्न सकेको थिएन ।

स्थायी कमिटी बैठक बस्नु अघि १७ गते (सोमबार) राती याक एण्ड यतीमा बैठक बसेर दुवै पक्षका नेताहरुले एकप्रकारको खाका बनाएको स्रोतको दावी छ । यस विषयमा प्रधानमन्त्री निवास बालुवाटारमा मंगलवार बसेको स्थायी कमिटी बैठकमा छलफल भएको थियो । बैठकमा एकताको लागि भइरहेका छलफलबारे विवेचना भएको प्रवक्ता प्रदीप ज्ञवालीले जानकारी दिए । ‘आन्तरिक एकतालाई सुदृढ गर्नको लागि भइरहेको छलफलको विवेचना गरेका छौं, नेतृत्वको तर्फबाट एकताका लागि अन्तिमसम्म प्रयत्न जारी राख्नेबारे छलफल भएको छ,’ ज्ञवालीले भने । स्रोतका अनुसार सोमबार साँझकै बैठकमा भएको सहमति अनुसार एमालेभित्रको वातावरण संग्लिने संभावना रहेको छ ।

एमाले प्रवक्ता ज्ञवालीले कांग्रेस सभापति देउवालाई प्रधानमन्त्री बनाउन केही साथीहरुले महिमा मण्डल गरेका कारण एकताको प्रयास सार्थक नभएको टिप्पणी गरे । ‘देउवालाई प्रधानमन्त्री बनाउने कुरालाई केही साथीले महिमा मण्डल बनाउनु भएको, त्यो प्रयास र एकताको चाहनामा तादम्यता मिल्दैन,’ ज्ञवालीले भने । प्रवक्ता ज्ञवालीले पार्टीमा सहमतिका लागि यसअघि गठन गरिएको कार्यदल अस्तित्वमा नरहेकोले नेताहरुबीच छलफल भइरहेको बताए । ‘त्यो पुरानो कार्यदल अस्तित्वमा छैन, कार्यदल पुनर्गठन हुन सक्ला । हामी बेग्लै हिसावले विभिन्न छलफल गरेका छौ’, ज्ञवालीले भने ।

सहमतिको प्रयास स्वरुप एमालेका दुवै पक्षका नेताहरुबीच सोमवार राति पनि छलफल भएको थियो । एमालेको उच्च स्रोतका अनुसार अहिले दुवै पक्ष २०७५ साल जेठ २ गतेको अवस्थामा पार्टीलाई फर्काएर लैजान सकिने अवस्थामा पुगेका छन् । तर ओलीले आह्वान गर्दा नेपाल समूहले मान्नु पर्यो भन्ने ओली पक्षको धारणा रहेको छ ।

‘अहिलेसम्म पार्टी विभाजन भैनसकेको र पार्टीभित्रै अन्तरसंघर्ष गर्ने भनिएकाले दोस्रो पुस्ताका नेताहरुले गरिरहेको प्रयास सकारात्मक रहेको छ’, ओली समूहका एक नेताले भने । उनका अनुसार पार्टीलाई २०७५ जेठ २ गतेको अवस्थामा लैजाने र महाधिवेशन गरेर अघि बढ्ने हो भने त्यहाँबाट समस्या समाधान गर्न सकिने अवस्था छ । अहिलेको प्रमुख समस्या भनेकै आगामी निर्वाचनमा माधव नेपाल पक्षलाई कति सिट दिने र उनीहरुले कति लिने भन्ने बारेमा विवाद अड्किएको स्रोतको दावी छ ।