जेठ महिनाभर निषेधाज्ञा गर्ने तयारी, खाद्यान्न र किराना पसल फेरि बिहान ९ बजेसम्म खोल्न पाइने

१८ जेठ, काठमाडौं । गत बैशाख १६ गतेदेखि उपत्यकामा जारी निषेधाज्ञा जेठ महिनाभरी गर्ने तयारी गरिएको छ । आज मंगलबार अपराह्न बसेको उपत्यकाका तीन जिल्लाका प्रमुख जिल्ला अधिकारीहरुको भर्चुअल बैठकले जारी निषेधाज्ञाका कारण कोरोना संक्रमण दर कम हुँदै गएकोले जेठ महिनाभर अर्थात थप १० दिने लम्ब्याउने बारे छलफल गरेको हाे ।

तर खाद्यान्न र किराना पसलहरु भने फेरि बिहान ९ बजेसम्म खोल्न पाइने भएको छ । खाद्यान्न, किराना पसल, खाद्यान्न मात्र बिक्री गर्ने डिपार्टमेन्ट स्टोर बिहान ९ बजेसम्म खोल्न दिनेबारे छलफल भएको काठमाडौंका प्रमुख जिल्ला अधिकारी कालीप्रसाद पराजुलीले नेपालबहसलाई जानकारी दिए ।

प्रजिअ पराजुलीका अनुसार आजको बैठकमा छलफल मात्रै भएको र स्वास्थ्य मन्त्रालय लगायत सम्बद्ध निकायसँग राय लिई बुधबार निर्णय गरिने उनले बताए ।

त्यस्तै विकास निर्माणका क्षेत्रमा काम रोकिएकोले निर्माणस्थलमै आवासीय रुपमा कामदार राखेर निर्माणका काम गर्न दिनेबारे पनि छलफल भएको छ । कोरोना भाइरस संक्रमणको चेन ब्रेक गर्न भन्दै उपत्यकामा निषेधाज्ञा लगाइएको एक महिना पूरा भइसकेको छ ।