एमाले स्थायी कमिटी बैठक आज पनि बस्दै

१९ जेठ, काठमाडौं । एमाले स्थायी कमिटी बैठक आज पनि बस्दैछ । बैठक ‘आज’ अपराह्न ४ बजे प्रधानमन्त्री निवास बालुवाटारमा बस्ने छ । बैठकमा पार्टी एकताको लागि अहिलेसम्म भएका पहलबारे समीक्षासँगै अब एकतालाई कायम राख्नेगरी कसरी अगाडि बढ्ने भन्नेबारे छलफल हुनेछ ।

यसअघि मंगलबार  बैठकले पार्टीलाई एकताबद्ध राख्न हदैसम्म लचिलो बन्ने र अर्को पक्षले अनुशासनहीन गतिविधि जारी राखे पनि एकता जोगाउन सकेसम्म पहल गर्ने निर्णय लिएको थियो ।

एमालेको विवाद उत्कर्षमा पुग्दा अध्यक्ष केपी ओलीले १० जेठमा बरिष्ठ नेता माधवकुमार नेपाल सहित एघार जनालाई निस्कासन गरेका छन् । थप १२ जनालाई त्यसैदिन २४ घण्टे स्पष्टिकरण सोधिएको थियो । तर मंगलबारको बैठकले यसबारे कुनै निर्णय गरेन ।

७ जेठमा नेपाली कांग्रेसका सभापति शेरबहादुर देउवालाई प्रधानमन्त्री बनाउन नेता नेपाल समूहका २६ सांसदले हस्ताक्षर गरेका थिए ।

संविधानको धारा ७६ ‘५’ अनुसार देउवालाई प्रधानमन्त्री प्रस्ताव गर्दै हस्ताक्षर गरेका एमाले सांसदहरुलाई ओलीले कारबाही प्रक्रिया अगाडि बढाएका छन् । २३ मध्ये तीन जना भने आफ्नो निर्णयबाट पछि हटे पछि उनीहरुलाई स्पष्टिकरण सोधिएको छैन ।