चुरे क्षेत्र बेच्ने कुरा राष्ट्रघातीः यादव

१९ जेठ, काठमाडौं । सरकारले जेठ १५ गते सार्वजनिक गरेको बजेट बक्तव्यमा चुरे क्षेत्रको खानीजन्य ढुंगा गिट्टी र बालुवा निकासी गरी भारतसँगको व्यापार घाटा न्यून गर्ने भनिएको विषयमा मधेस केन्द्रित जनता समाजवादी पार्टीले कडा विरोध जनाएको छ ।

जसपा अध्यक्ष उपेन्द्र यादवले आज पार्टीको आधिकारिक धारणा प्रस्तुत गर्ने क्रममा जारी गरेको विज्ञप्तिमा यस्तो विरोध जनाइएको हो । सरकारले ल्याएको उक्त व्यवस्थाले मधेसको आधारस्तम्भका रुपमा रहेको चुरे क्षेत्र मरुभूमि बन्ने खतरा बढेको उनले प्रष्ट्याएका छन् । यसले चुरे क्षेत्रको विनाश गरी वातावरणीय सन्तुलनसमेत गुम्ने खतरा बढाउने उनले औंल्याएका छन् ।

व्यापार न्यूनीकरण गर्ने नाममा यस्तो राष्ट्रघाती काम गर्ने छूट कसैलाई नरहेको पनि उनले स्पष्ट गरेका छन् । यो व्यवस्था हटाइएन भने केही वर्ष भित्रै मधेस मरुभूमिमा रुपान्तरण हुने उनले उल्लेख गरेका छन् ।

मधेसको उर्वतालाई समाप्त गर्न यो षडयन्त्र गरिएको भन्दै अध्यक्ष यादवले भरपर्दाे वैज्ञानिक ढंगले यसबारे विस्तृत अध्ययन नगरी यस्तो निकासी गर्न दिन नहुने माग गरेका छन् ।

उता, मधेसकै नाममा राजनीति गर्ने राजपाकै अर्काे पक्ष भने यो मुद्धामा चूपचाप देखिएको छ । महन्थ ठाकुर – राजेन्द्र महतो पक्ष भने सरकारको रक्षाकवचका रुपमा रहेको छ । आज वा भोलि नै ओली सरकारमा सहभागी हुने तयारीमा यो पक्ष रहेको छ ।