तत्काल केन्द्रीय कार्यसमितिको बैठक बोलाउन पौडेल पक्षको माग

१९ जेठ, काठमाडौं । नेपाली कांग्रेसका वरिष्ठ नेता रामचन्द्र पौडेल पक्षले केन्द्रीय कार्यसमितिको बैठक बोलाउन माग गरेका छन्। पौडेल समूहले बुधबार आयोजना गरेको भर्चुअल छलफलले उक्त केन्द्रीय समितिको बैठक बोलाउन सभापतिसमक्ष माग गर्ने निष्कर्ष निकालेको हो।

छलफल तोकिएकै मितिमा महाधिवेशन हुनुपर्नेमा एकमत देखिएको थियो। महाधिवेशनबारे छलफल गर्न बैठक बोलाउन महामन्त्री डा. शशांक कोइरालामार्फत् बैठक बोलाउन पहल गर्ने निर्णय भएको छलफलमा सहभागी पौडेल निकट एक नेताले बताए।

छलफलले पार्टीका आन्तरिक समस्या समधान गर्न सभापति शेरबहादुर देउवासँग वार्ता गर्ने जिम्मा कोइरालालाई दिएको छ। निर्विवाद क्रियाशील सदस्यबाट महाधिवेशन गराउने, विवादित सदस्यको हकमा अर्को महाधिवेशनलाई थाती राख्न सकिने विषयमासमेत छलफल भएको थियो।

भर्चुअल बैठकका क्रममा नेताहरुले विवाद नटुंगिए कसरी महाधिवेशन गर्ने भन्नेबारे समेत धारणा राखेका थिए । छलफलमा १३ औं महाधिवेशनका प्रतिनिधिबाट भएपनि महाधिवेशन गर्नुपर्ने रायसमेत कतिपय नेताहरुले राखेका छन् । तर १३ औं महाधिवेशनपछि पार्टी एकता प्रक्रियामा आएकाहरुलाई कसरी महाधिवेशनको प्रक्रियाबाट बञ्चित गर्ने भनेर प्रश्न पनि उठेको छ ।

१२ जेठमा प्रेस युनियनको कार्यक्रममा वरिष्ठ नेता रामचन्द्र पौडेलले अहिले टुंगो लागेका क्रियाशील सदस्यबाट वा १३ औं महाधिवेशनका क्रियाशील सदस्यबाट एक वर्षका लागि केन्द्रीय सदस्य निर्वाचित गर्ने प्रस्ताव अघि सारेका थिए । तर बुधबार भएको छलफलमा उनले यसबारे केही भनेनन् ।