सेती अस्पतालमा कालो ढुसी संक्रमितको मृत्यु

२० जेठ, धनगढी । धनगढीस्थित सेती प्रादेशिक अस्पताललमा उपचाररत एक जनाको म्यूकोर्माइकोसिस ‘कालो ढुसी’ संक्रमितबाट मृत्यु भएको छ। जेठ १७ गतेदेखि अस्पतालमा उपचाररत कैलालीको बर्दगोरियाका गाउँपालिका-६ तुलसीपुरका ६५ वर्षीय पुरुषको मृत्यु भएको हो।

उनको आज बिहान मृत्यु भएको सेती प्रादेशिक अस्पतालले जनाएकाे छ । उनमा लक्षण देखिएपछि ‘बायोप्सी’ परीक्षण गर्दा कालो ढुसी पुष्टि भएको थियाे ।  मिर्गौलासम्बन्धी रोगबाट ग्रसित उनी जेठ १७ गते अस्पताल भर्ना भएका थिए ।

कालो ढुसीको संक्रमण पुष्टि भएसँगै उनलाई एम्फोटेरिसेन बी नामको औषधि दिए पनि उनलाई बचाउन नसकिएको अस्पतालले जनाएको छ। कालो ढुसी धेरैजसो रोग प्रतिरोधी क्षमता कमजोर भएको मानिसमा देखिने गर्छ ।

यसले शरीरको जुनसुकै अंगमा समेत असर गर्न सक्ने डाक्टहरुले बताएका छन् । यो रोगको संक्रमण बढीजसो आँखा, फोक्सो, किड्नी तथा छालामा यसको संक्रमण देखिएको छ ।