नेपाल समूहको केन्द्रीय कमिटी बैठक आज पनि बस्दै

२१ जेठ, काठमाडौं । नेकपा एमालेका वरिष्ठ नेता माधवकुमार नेपाल समूहको केन्द्रीय कमिटी बैठक आज पनि बस्दैछ । बिहीबार देखि शुरु भएको भर्चुअल बैठक अहिले केही बेरमा सुरु हुने छ ।

बिहीबार ३९ केन्द्रीय सदस्यले आफ्नो राय प्रस्तुत गरेका थिए । बाँकी नेताहरुले छलफलमा राय राखेपछि आज बैठक सकिनेछ । पार्टीभित्रको विवाद, विकसित राजनीतिक अवस्था र भावी योजना तय गर्नेगरी बैठक चलिरहेको छ ।

केन्द्रीय सदस्यहरुले बोल्ने क्रम नसकिएकाले आज पुनः बैठक बस्न लागेको हो। बिहीबार करिब ६ घन्टा लामो केन्द्रीय कमिटीको बैठक चलेको थियो।

बैठकमा बोल्ने केन्द्रीय कमिटीका सबै सदस्यहरुले पार्टीलाई २०७५ जेठ २ को अवस्थामा फर्केर लैजाने विषयमा आफूहरू एकताबद्ध भए पनि पार्टी अध्यक्ष केपी ओलीले एकता गर्न नचाहेको बताएका थिए।

उनीहरूले आफू निकट नेतृत्वलाई कुनै पनि हालतमा ओलीको चालबाजीमा फसेर सहमतिका नाममा अघि बढ्न काम नगर्न पनि ध्यानाकर्षण गराएका थिए। हिजो बैठकमा बोल्ने केन्द्रीय सदस्यहरूले वार्ताका नाममा अलमलिएर अघि बढ्न नहुने भन्दै छिटो निर्णयमा पुग्नुपर्ने बताएका थिए।