नयाँ मन्त्रीहरूको शपथ आज बेलुकी ८ बजे हुने

२१ जेठ, काठमाडाैं । प्रधानमन्त्री केपी ओलीले मन्त्रिपरिषदमा रहेका केही मन्त्रीको जिम्मेवारी हेरफेर गर्ने भएका छन् । ओली सरकारमा रहेका केही मन्त्री कायम भएपनि अधिकांश मन्त्री बाहिरिने भएका छन्।

जनता समाजवादी पार्टीको महन्थ ठाकुर र राजेन्द्र महतो पक्ष सरकारमा सहभागी हुन लागेपछि ओलीले मन्त्रिपरिषद पुनर्गठन गरेका हुन् ।जसअनुसार बिष्णु पौडेल, रघुवीर महासेठ र राजेन्द्र महतो उपप्रधानमन्त्री बन्दैछन्

शितलनिवासमा नयाँ मन्त्रीहरूको शपथ आज बेलुकी ८ बजे हुने स्रोतले बताएको छ । प्रधानमन्त्री ओलीले यसअघिका चार जनाबाहेक एमालेका सबै मन्त्रीहरूलाई हटाउने भएका छन् ।

उनले अर्थमन्त्री बिष्णु पौडेल, शिक्षा मन्त्री कृष्णगोपाल श्रेष्ठ, कानुन मन्त्री लीलानाथ श्रेष्ठ, भौतिक पूर्वाधार मन्त्री बसन्त नेम्वाङबाहेक सबैलाई हटाउन लागेको स्रोतले जानकारी दिएको छ ।

ओलीले रघुवीर महासेठलाई परराष्ट्रमन्त्री र शेरबहादुर तामाङलाई स्वास्थ्यमन्त्री बनाउने भएका छन् । प्रधानमन्त्री ओलीले जसपाका ८ जना मन्त्री र दुई राज्यमन्त्री तथा एमालेका दुई मन्त्रीलाई शपथ गराउने तयारी गरेका छन् ।

एमालेबाट उपप्रधानमन्त्री तथा परराष्ट्रमन्त्रीको जिम्मा महासेठले पाउने भएका छन् । तामाङले स्वास्थ्य मन्त्रालयको जिम्मेवारी पाउने भएका छन् ।