संवैधानिक इजलाशमा सुनुवाई सुरु

२३ जेठ, काठमाडौं । प्रतिनिधिसभा विघटनविरुद्ध मुद्धाको सर्वोच्च अदालतको संवैधानिक इजलाशमा सुनुवाई सुरु भएको छ। प्रधानन्यायाधीश चोलेन्द्रशमशेर राणाले वरिष्ठताका आधारमा गठन गरेको संवैधानिक इजलाशमा सुनुवाई सुरु भएको हो ।

यसअघि गठित इजलाशका विषयमा कानुन व्यवसायीहरूले प्रश्न उठाएका थिए । न्यायाधीश दीपककुमार कार्की र डा.आनन्दमोहन भट्टराईले पनि इजलाशमा रहेका न्यायाधीश तेजबहादुर केसी र बमकुमार श्रेष्ठको विषयमा प्रश्न उठेपछि आफूहरू नबस्ने राय पेस गरेका थिए।

जेठ १६ मा प्रधानन्यायाशीशले आजका लागि इजलाश तोक्ने र वरिष्ठताका आधारमा नै गठन गर्ने घोषणा गरेका थिए । आज प्रधानन्यायाधीशले आफ्नो नेतृत्वमा वरिष्ठतम् न्यायाधीशहरू दीपकुमार कार्की, मीरा खड्का, ईश्वरप्रसाद खतिवडा र डा. आनन्दमोहन भट्टराई समावेश गरेर इजलाश गठन गरेका छन्।

सर्वोच्च अदालतमा प्रतिनिधिसभा विघटनविरुद्ध ३० वटा रिट निवेदन परेका छन्। रिट निवेदकले प्रतिनिधिसभा पुनःस्थापना, शेरबहादुर देउवालाई ७६ ‘५’ बमोजिम प्रधानमन्त्री नियुक्त लगायतका मागहरू राखेर अन्तरिम आदेश जारी गर्न माग गरेका छन्।

यसअघि गत पुष ५ गतेको प्रतिनिधिसभा विघटन विरुद्धको मुद्धा सुनुवाइका लागि गठित इजलाशमा न्यायाधीश हरिकृष्ण कार्कीमाथि स्वार्थ बाझिने भन्ने प्रश्न उठेको थियो ।

विगतमा कार्की महान्यायाधिवक्ता रहेका कारण प्रधानमन्त्री विपक्षी रहेको मुद्दामा स्वार्थ बाझिने भन्दै रिट निवेदकपक्षका कानुन व्यवसायीले प्रश्न उठाएपछि उनले इजलाश छाडेका थिए ।