प्रचण्डको बढ्यो सक्रियता

२४ जेठ, काठमाडौं । प्रतिनिधिसभा विघटन सम्बन्धी रिटको सुनुवाईमा भएको ढिलाई र एमाले अध्यक्षसमेत रहेका प्रधानमन्त्री केपी ओलीले खनाल– नेपाल पक्षलाई एकताका लागि गरेको आह्वानपछि विकसित राजनीतिक परिवेशले नेकपा माओवादी अध्यक्ष पुष्पकमल दाहाल ‘प्रचण्ड’लाई सक्रिय बनाएको छ ।

आज बिहानै प्रचण्डले एमाले नेता माधवकुमार नेपाललाई कोटेश्वरस्थित उनकै निवास पुगेर छलफल गरे । लगत्तै उनी कांग्रेस सभापति शेरबहादुर देउवा निवास बूढानिलकण्ठ पुगे ।

भेटका अवसरमा प्रचण्डले समसामयिक विषयमा कुरा गरेको बुझिएको छ । खासगरी सर्वाेच्च अदालतमा भइरहेको ढिलाईका पछाडि कसैको डिजाइन त छैन भन्ने सन्दर्भमा कुरा भएको प्रचण्ड निकट स्रोतले बताएको छ ।

यसैगरी नेता नेपालसँग भने ओलीको प्रस्तावबारे छलफल भएको बुझिएको छ । यसबारे आज नेपाल पक्षले स्थायी कमिटी बैठक डाकेको छ । बैठकले लिने निर्णयपछि मात्रै थप छलफल गर्न दुबै नेता सहमत भएका छन् ।