पुनर्गठनपछि पहिलो क्याबिनेट बैठक

२४ जेठ, काठमाडौं । जनता समाजवादी पार्टीका १० मन्त्री थपेपछि पहिलोपटक आज प्रधानमन्त्री केपी ओलीले मन्त्रिपरिषद बैठक डाकेका छन् । साँझ ५ बजेका लागि बैठक बालुवाटारमा डाकिएको हो ।

आजको बैठक नियमित भएको बालुवाटार स्रोतले जनाएको छ । तर जसपाका तर्फबाट भने आज संविधान संशोधनका विषयमा आधिकारिक रुपमै कार्यदल बनाउने प्रस्ताव जाने बुुझिएको छ ।

प्रधानमन्त्री ओली बाँकी ७ वटा मन्त्रालयमा समेत मन्त्री थप्ने तयारीमा छन् । उनले माधव नेपाल पक्षबाट कम्तिमा दुुर्इृजना तानेर मन्त्री बनाउने तयारी थालेका छन् । नेपाल पक्षले आज स्थायी कमिटी बैठक राखेको छ । उक्त बैठकमा योगेश भट्टराई र गोकर्ण विष्टले ओलीको सर्त मानेर जानुपर्ने धारणा राख्ने बुुझिएको छ ।

त्यसले नेपाल पक्षमा विभाजन आउने सम्भावना देखेर ओलीले भट्टराई र विष्टलाई मन्त्री बनाउन चाहेका छन् । त्यसैले हिजै विस्तार गर्न लागिएको भएपनि रोकिएको छ ।

संभवतः भोलि साँझसम्म विस्तार भइसक्ने अनुमान बालुवाटार निकट स्रोतले गरेको छ ।