आज पनि तोकिएन संवैधानिक इजलाश

२५ जेठ, काठमाडौं । प्रतिनिधिसभा विघटनविरुद्धको मुद्धा सुनुवाइका लागि आज पनि संवैधानिक इजलाश तोकिएको छैन। सोमबार प्रधानन्यायाधीश अस्वस्थ रहेको भन्दै इजलाश नतोकिएपछि सुनुवाइ स्थगित भएको थियो ।

आज पनि उक्त मुद्धाको सुनुवाइका लागि संवैधानिक इजलाश तोकिएको छैन । प्रधानन्यायाधीश अस्वस्थ रहेकाले अर्को इजलाश कहिले तोकिने भन्ने अझै यकिन नभएको सर्वोच्च अदालत प्रशासन स्रोतले जानकारी दिएको छ।

प्रतिनिधिसभा विघटनविरुद्ध सर्वोच्च अदालतमा ३० वटा रिट निवेदन दर्ता भएका छन् । जेठ १४ गतेबाट संवैधानिक इजलाशमा सुनुवाइ सुरु भए पनि अहिलेसम्म मुद्धाको मूल विषयमा बहस अघि बढ्न सकेको छैन।

रिट निवेदक पक्ष र सरकारी पक्षले इजलाश गठनका विषयमा पटक-पटक मुद्दा उठाएपछि प्रक्रिया अघि बढ्न नसकेको हो।