ओलीको ६ बुँदे प्रस्तावलाई पार्टी एकताको इमान्दार प्रयास मान्न नसकिने गौतमको निष्कर्ष

२५ जेठ, काठमाडौं । एमाले नेता वामदेव गौतमले पार्टी एकतामा अध्यक्ष केपी ओलीको प्रयत्न इमानदार नदेखिएको प्रतिक्रिया दिएका छन्।

गौतमले पार्टी एकताका लागि ओलीले गरेको ६ बुँदे प्रस्तावका सम्बन्धमा पार्टी एकता राष्ट्रिय अभियानको कार्यसम्पादन समितिका सदस्यहरुबीच छलफलपछि यस्तो निष्कर्ष निकालेको जनाएका हुन्।

मंगलबार गौतमले एक विज्ञप्ति जारी गर्दै अध्यक्ष ओलीलाई २०७५ जेठ २ गते कायम रहेको दुई बरिष्ठ नेता, चार उपाध्यक्ष, एक महासचिव, दुई उपमहासचिव र पाँच सचिवसहितको स्थायी कमिटी बैठक बोलाउन आग्रह गरेका हुन् ।

उनले पार्टी अध्यक्ष तथा प्रधानमन्त्री ओलीले एकताका लागि पेश गरेको ६ बुँदे प्रस्तावपछि पार्टी एकता राष्ट्रिय अभियानको कार्यसम्पादन समितिको बैठक बसेको र बैठकले ओलीको ६ बुँदे प्रस्तावलाई पार्टी एकताको इमान्दार प्रयास मान्न नसकिने निष्कर्ष निकालेको बताएका छन् ।

गौतमले भनेका छन्, ‘अध्यक्षले वक्तव्यमा आफ्नै प्रशंशालगायत कुटिल चातुर्य र जालझेलको अनुमान गर्न सकिने भाषाशैलीको प्रयोगका बाबजुद बुँदा न। १ मा ‘नेकपा ‘एमाले’ लाई २०७५ जेठ ३ गते पूर्वको अवस्थाबाट अगाडि बढाइनेछ’ भनेको विषयलाई बैठकले सकारात्मक रुपमा ग्रहण गरेको छ। तर सोही बुँदामा एकताको पक्षमा उभिएका कमरेडहरुलाई आधार मानेर केन्द्रीय कमिटी र स्थायी कमिटीका संरचना गतिशील हुने भन्ने विषय एमालेभित्रको समस्यामा ल्याउनु अनुचित छ। त्यसैगरी जनवर्गीय संगठनहरुका संरचनाका सम्बन्धमा मूलभूत रुपमा भन्नुको अर्थ २०७५ जेठ ३ पूर्वको जस्ताको तस्तै अवस्थालाई अस्वीकार पनि गर्न सकिन्छ भन्ने हो जसलाई इमानदार एकताको प्रयत्न मान्न सकिन्न।’