सीईडीबी हाइड्रोपावरको शेयरमा खरीद चाप उच्च

२६ जेठ, काठमाडौं । धितोपत्र दोस्रो बजारमा सीईडीबी हाइड्रोपावर डेभलपमेन्ट कम्पनी लिमिटेडको बुधवारदेखि शेयर कारोबार शुरु भएको छ ।

मंगलवार कुल ८३ लाख ९४ हजार १०० कित्ता शेयर नेप्सेमा सूचीकृत गराएको कम्पनीको सीएचडीसी स्टक संकेतबाट शेयर कारोबार शुरु भएको हो । कम्पनीले  ८३ करोड ९४ लाख १० हजार चुक्तापूँजी बराबरको उक्त शेयर सूचीकृत गराएको हो ।

कम्पनीको पहिलो कारोबारका लागि नेप्सेले प्रतिकित्ता  १३८ दशमलव ७९ देखि  ४१६ दशमलव ३७ सम्मको मूल्य रेञ्ज तोकेको थियो । नेप्सेले तोकेको अधिकतम मूल्यमै प्रि ( ओपनिङ सेसनमा कारोबार भएसँगै सोहि मूल्यमा नियमित सेसनको कारोबार शुरु भएको हो ।

पहिलो कारोबार दिन कम्पनीको शेयर खरीद चाप सबैभन्दा बढी रहेको छ । कारोबारको २२ मिनेटको अवधिसम्ममा कम्पनीको ५ लाख ९० हजार ३५६ कित्ता शेयर खरीद माग रहेको छ भने विक्रीकर्ता देखिएका छैनन् ।

यस अवधिसम्म कम्पनीको  ३३ हजार ७६० बराबरको ८० कित्ता शेयर कारोबार भएको छ ।

कम्पनीले सर्वसाधारणका लागि गत वैशाख ३१ गते आईपीओ बाँडफाँट गरेको थियो ।