आज नेपाली कांग्रेसको पदाधिकारी बैठक बस्दै

२९ जेठ, काठमाडौं । नेपाली कांग्रेसको पदाधिकारी बैठक शनिबार बस्दै छ । कांग्रेस सभापति शेरबहादुर देउवाले बोलाएको बैठक आज बुढानीलकण्ठमा दिउँसो २ बजे बस्ने भएको हो ।

बैठकमा आसन्न महाधिवेशनको विषयमा छलफल हुने बताइएको छ । साथै बैठकमा संवैधानिक व्यवस्था अनुसार आगामी भदौसम्ममा पार्टीको १४औं महाधिवेशन सम्पन्न गरिसक्नुपर्ने अवस्था भए पनि कोरोना महामारीका कारण कार्यतालिका प्रभावित हुने भएपछि सोही विषयमा छलफल गर्न पदाधिकारी बैठक बोलाइएको नेपाली काँग्रेसले जनाएको छ ।

पूर्व निर्धारित कार्यतालिकाअनुसार असारमा वडा तहको अधिवेशन सुरु गर्नुपर्ने हुन्छ । तर अहिलेसम्म क्रियाशील सदस्यताको टुंगो समेत नलागिसकेको अवस्थामा कार्यतालिका अनुसार महाधिवेशन गर्न कठिन देखिएको छ ।

हालसम्म झण्डै ८ लाख क्रियाशील सदस्यको विवरण डेटा सिस्टममा इन्ट्री भएको छ, तर त्यसलाई प्रकाशित गरेर उजुरी समेत आह्वान गर्न बाँकी छ ।