प्रदेशसभाको बैठकमा आत्मलोचनासहित माफी मागे सांसद वैद्यले

२९ जेठ, काठमाडौं । नेपाली कांग्रेस वाग्मती प्रदेशसभा सदस्य नरोत्तम वैद्यले प्रदेशसभाको बैठकमा हिजो आफुले दिएको अभिव्यक्तिप्रति आत्मलोचनासहित माफी मागेका छन् ।

संसदीय मर्यादाविपरीतको अभिव्यक्ति दिएको भन्दै चौतर्फी आलोचना एवम् विरोधपश्चात् आजको प्रदेशसभा बैठकमा उनले पार्टीको निर्देशनअनुसार आत्मालोचना एवम माफी मागेका हुन ।

आजको बैठकको सुरुमा समय माग गर्दै उनले भने ‘मैले संसद्को रोस्ट्रममा उभिएर प्रतिक्रिया दिने क्रममा प्रधानमन्त्रीप्रति लक्षित गर्दै मबाट प्रयोग भएको शब्दहरु आपत्तिजनक र संसदीय मर्यादाविपरीत भएको भनी मेरो संसदीय दलले उक्त अभिव्यक्ति फिर्ता लिन निर्देशन गरेअनुसार आफ्नो भनाई फिर्ता लिन्छु ।’

शुक्रबारको नीति तथा कार्यक्रमको छलफलमा आफ्नो धारणा राख्ने क्रममा सांसद वैद्यले महात्मा गान्धीको हत्यारा नाथुराम गोड्सेको नाम लिएर प्रधानमन्त्री केपी शर्मा ओली विरुद्ध आफू गोड्से बन्न तयार रहेको अभिव्यक्ति दिएका थिए ।

उनको भनाई सच्याउन र आत्मलोचना सहित माफी माग्न उनको दलले निर्देशन दिएको थियो । एमालेले त्यसको विरोधमा विज्ञाप्ति मार्फत उनको भनाईप्रति फौजदारी कानून आकर्षित हुन सक्ने बताएको थियो ।