आगामी तीन दिन नदीहरूमा आकस्मिक बाढी आउनसक्‍ने, सतर्कता अपनाउन आग्रह

३१ जेठ, काठमाडौं । जल तथा मौसम विज्ञान विभाग बाढी पूर्वानुमान महाशाखाले आगामी तीन दिन विभिन्‍न मझौला नदीहरूमा आकस्मिक बाढी आउनसक्‍ने भएकोले सतर्कता अपनाउन आग्रह गरेको छ ।

कमला, बागमती, पूर्वी राप्ती, तिनाउ, पश्चिम राप्ती, बबई र यसका केही स-साना नदीजलाधारमा क्षणिक मध्यमरभारी वर्षा भई बहाब केही बढ्ने र केहीमा आकस्मिक बहाब पनि हुन सक्ने भएकोले सतर्कता अपनाउन महाशाखाले आग्रह गरेको हो ।

महाशाखाका अनुसार देशभर सामान्य देखि पूर्ण बदली भइरहेकाे छ। देशका धेरै स्थानहरुमा मेघगर्जन र चट्टयाङ्ग सहित हल्कादेखि मध्यम वर्षाको सम्भावना रहेको छ ।  प्रदेश नं २, बागमती प्रदेश, गण्डकी प्रदेश, सुदुरपश्चिम प्रदेश तथा लुम्बिनी प्रदेशका एक-दुई स्थानहरुमा भारी बर्षाको समेत सम्भावना छ ।