भेरीमा भोलीदेखि ओपीडी सेवा पुनः सञ्चालन गरिने

३१ जेठ, बाँके । भेरी अस्पतालले असार १ गते भोलीदेखि ओपीडी सेवा पुनः सञ्चालन गर्ने भएको छ । वैशखा पहिलो हप्तादेखि कोरोना भाइरस महामारी दोस्रो लहरसँगै ओपीडी बन्द गरेको भेरी अस्पतालले असार १ गते भोलीदेखि पुनः सञ्चालन गर्ने जनाएको हो ।

भेरीले कोरोना बिरामीका लागि दुई सय बेड सञ्चालन गरेको थियो । महामारीका बेला त्यहाँ ३ सय २६ जनासम्म बिरामी आएका थिए । अहिले ६८ जना कोभिड–१९ का बिरामी छन् ।

एक सय १७ बेड खाली भएका छन् । बेड खाली हुने अवस्था आएकाले ओपीडी सञ्चालन गर्ने निर्णयमा पुगेको अस्पताल प्रशासनले जनाएको छ । यसअघि नेपालगन्ज मेडिकल कलेज शिक्षण अस्पताल कोहलपुरले बहिरंग सेवा ‘ओपीडी’ सञ्चालनमा ल्याइसकेको छ ।

कोहलपुरले १ सय ३० बेड कोरोना बिरामीका लागि छुट्याएकोमा अहिले एक सय ८ बेड खाली भएको छ । बाँकेका अस्पतालहरुमा अहिले बाँकेका ९१ जना बिरामीको उपचार भइरहेको छ ।

बाँकेमा कोरोना भाइरस संक्रमितको संख्या ओरालो लागेसंगै यतिबेला यहाँको जनजिवन सामान्य बन्दै गएकोछ । देशमै सबैभन्दा बढि कोरोना भाइरस संक्रमणले ग्रसित बाँके जिल्ला पछिल्ला केही दिनदेखि संक्रमित थपिने र मृत्युदर घटेपछि जिल्ला कोभिड–१९ संकट व्यवस्थापन ‘डीसिसिएमसी’ बाँकेले निषेधाज्ञालाई समते केही खुकुलो बनाउदै लगेको छ ।