उपत्यकाको निषेधाज्ञा खुकुलो, अब साँझबिहान हिँडडुलदेखि केही व्यापार गर्न पाइने

१ असार, काठमाडौं । आजदेखि बिहान ११ बजेसम्म पुस्तक पसल खुल्ने भएका छन् । कोरोना संक्रमण रोकथाम तथा नियन्त्रणका लागि काठमाडौं उपत्यकामा आजबाट थप एक साता लम्बिएको निषेधाज्ञा अघिल्लो पटकको भन्दा खुकुलो बनाइएपछि निषेधाज्ञा खुकुलो बनेसँगै उपत्यकामा मानिसहरुको चहलपहल बढेको हो ।

संक्रमण दर घट्दै गएकाले निषेधाज्ञा खुकुलो बनाउने निर्णय उपत्यकाका तीनवटै जिल्लाका प्रमुख जिल्ला अधिकारीहरुको संयुक्त बैठकले गरेको निर्णय अनुसार आजबाट निषेधाज्ञा खुकुलो बनाएसँगै स्टेशनरी र हार्डवेयर पसल पनि खल्ने भएका छन् ।

आजबाट काठमाडौं उपत्यकाको निषेधाज्ञा खुकुलो बनाइएपछि अबका सात दिन बिहान तथा साँझ हिँडडुलदेखि केही व्यापार व्यवसाय गर्न समेत पाइने भएको छ ।

काठमाडौं, भक्तपुर र ललितपुरका प्रमुख जिल्ला अधिकारीको बैठकले ७ असारसम्म निषेधाज्ञा थप्ने निर्णय गरेका थिए। आजबाट थपिएको निषेधाज्ञा खुकुलो बनाउन आदेश दिएका छन्। उपत्यकामा १६ वैशाखबाट निषेधाज्ञा लागू छ।

आजबाट केही कामकाज गर्न पाइनेछ। तरकारी, फलफूल, खाद्यान्न, दूध डेरी, मासु, ग्यास, खानेपानी, किराना पसल तथा डिपार्टमेन्ट स्टोर ‘ग्रोसरी मात्र’ खोल्न पाइनेछ। यसका लागि बिहान ११ बजेसम्म समय तोकिएको छ। यसअघि १० बजेसम्म मात्रै खोल्न दिइएको थियो।

त्यस्तै, पुस्तक पसल र प्रिन्टिङ प्रेस पनि बिहान ११ बजेसम्म खुल्नेछन्। विकास निर्माण सामग्रीका पसलहरू अपराह्न ४ बजेपछि खोल्न पाइनेछ। ठूलो परिमाणको ढुवानी भने राति मात्रै गर्न पर्नेछ। आजबाट अत्यावश्यक सामानको होम डेलिभरी सेवा सञ्चालन हुनेछ। यसका लागि बिहानबाट साँझ ७ बजेसम्मको समय तोकिएको छ।

यसअघि जस्तै आगामी सात दिन पनि अत्यावश्यक सेवाका सवारी साधन सञ्चालन गर्न पाइनेछ। तरकारी, फलफूल, खाद्यान्न, दुग्धजन्य पदार्थ, कुखुराको दाना, चल्ला, ग्यास, खानेपानी ढुवानीका साधन बिहान ९ देखि ११ बजेसम्म चलाउन पाइनेछ।

यसका लागि सम्बन्धित सेवा लेखिएको ब्यानर वा प्रिन्ट टाँस्नुपर्नेछ। अब सातामा दुई दिन सहकारी संस्था र रेमिट पनि खुल्नेछन्। यसका लागि आइतबार र बिहीबार तोकिएको छ।