कांग्रेस महाधिवेशन कागजी मात्रै ?

१ असार, काठमाडौं । नेपाली कांग्रेसले पूर्व निर्धारित महाधिवेशन कार्यतालिका भदौको तेस्रो साताका लागि धकेलेपनि कोरोना महामारीका कारण सहज देखिएको छैन । यो स्थितिमा कसरी जाने भन्ने विषय कांग्रेसजनका लागि जटिल बन्दैछ ।

तर शीर्ष नेताहरु भने भागशान्ति जय नेपाल गरेर कागजी महाधिवेशन गर्न भित्री रुपमा सहमत भएका छन् । पार्टी सभापति शेरबहादुर देउवा र वरिष्ठ नेता रामचन्द्र पौडेलबीच भित्री रुपमा यस्तो साँठगाँठ भएको कतिपयले बताउन थालेका छन् ।

कोरोना महामारी नसकिउञ्जेलका लागि अहिलेकै पदाधिकारी र नयाँ विधान अनुरुप केही थप गरेर कागजी रुपमा महाधिवेशन गरेको दस्ताबेज निर्वाचन आयोगमा बुझाउने सहमति भएको बताइएको छ ।

यसबारे गत साता पौडेल पक्षीय नेताहरुको भर्चुअल बैठक हुँदा नेता डा.शेखर कोइरालाले प्रश्न उठाएका थिए । उनले देउवा र पौडेलले कागजी महाधिवेशन भएको रेकर्ड तयार गर्न सहमति जनाएको भन्ने सुनेका भन्दै जानकारी मागेका थिए । तर वरिष्ठ नेता पौडेलले यसबारे केही बोलेनन् ।

डा. शेखरले उठाएको सो विषयमा अरु नेता कार्यकर्ताले समेत प्रश्न गर्न थालेका छन् । त्यसैले यसबारे थप छलफल गर्न भन्दै आज पौडेल पक्षीय नेताहरु पूर्व महामन्त्रीसमेत रहेका कांग्रेस नेता प्रकाशमान सिंहको निवासमा अहिले भेला भएका छन् ।

संविधान बमोजिम भदौ तेस्रो साता भित्र चौधौं महाधिवेशन नगरे पार्टीको अस्तित्व नै संकटमा पर्ने अवस्था रहेको छ ।