यी दुई इन्स्योरेन्सले आईपीओ निष्कासनका लागि धितोपत्र बोर्डमा दिए निवेदन

१ असार, काठमाडौं । युनियन लाइफ इन्स्योरेन्स र सानिमा लाइफ इन्स्योरेन्स कम्पनीले आईपीओ निष्कासनको लागि अनुमति माग्दै नेपाल धितोपत्र बोर्डमा निवेदन दिएका छन् ।

दुवै कम्पनीले आईपीओ निष्कासनको लागि जेठ ९ गते बोर्डमा निवेदन दिएका हुन् । युनियन लाइफ इन्स्योरेन्सले ६४ करोड ५० लाख बराबरको ६४ लाख ५० हजार कित्ता र सानिमा लाईफ इन्स्योरेन्सले ६० करोड बराबरको ६० लाख कित्ता आईपीओ निष्कासनका लागि निवेदन दिएका हुन् । दुवै कम्पनीको आईपीओ विक्री प्रबन्धकमा प्रभु क्यापिटल रहेको छ ।

युनियन लाईफ इन्स्योरेन्स कम्पनीको चुक्तापूँजी हाल  १ अर्ब ५० करोड ५० लाख रहेको छ । युनियन लाईफ इन्स्योरेन्सको आईपीओलाई इक्रा नेपालले समयमै वित्तीय दायित्व पूरा गर्न सक्ने संकेत गर्ने ‘इक्राएनपि आइआर ट्रिपल बि’ रेटिङ प्रदान गरेको छ ।

त्यस्तै सानिमा लाईफ इन्स्योरेन्सको हाल चुक्तापूँजी १ अर्ब ४० करोड रहेको छ । सानिमा लाईफले निष्कासन गर्न लागेको आईपीओलाई केयर रेटिङ नेपालले वित्तीय दायित्व पूरा गर्ने सम्बन्धमा मध्यम सुरक्षित रहेको संकेत गर्ने त्रीपल बी माइनस रेटिङ प्रदान गरेको छ ।

दुवै कम्पनी नयाँ बीमा कम्पनीको रुपमा सञ्चालनमा रहेका हुन् । जीवन बीमा कम्पनीहरुले कायम गर्नुपर्ने  २ अर्ब बराबरको चुक्तापूँजी कायम गर्न आईपीओ जारी गर्न लागेका हुन् ।