सडकमा कोरोना बिर्साउने गरी ट्राफिक जाम: नागरिकको चहलपहल उस्तै !

१ असार, काठमाडाैं । कोभिड–१९ संक्रमण घट्न थालेपछि काठमाडौं उपत्यकामा आजदेखि लागू निषेधाज्ञालाई केही खुकुलो बनाइएको छ। लुज खालकाे निषाेधाज्ञाका कारण सडकमा कोरोना बिर्साउने गरी ट्राफिक जाम बढेकाे छ भने यतिबेला सडकमा नागरिकको चहलपहल उस्तै छ ।

तीन वटै जिल्लामा एकैसाथ लागू भएको निषेधाज्ञा असार ७ गते राति १२ बजेसम्मका कायम रहनेछ । काठमाडौं उपत्यकाकाको तीन जिल्ला ‘काठमाडौं, ललितपुर र भक्तपुर’ का प्रजिअसहित जेठ ३० मा बसेको संयुक्त बैठकले निषेधको आदेशलाई खुकुलो बनाउँदै असार १ देखि सात गतेसम्म थप्ने निर्णय गरेको थियो ।

निषेधाज्ञा खकुलो भएकोले उपत्यकाका सडकमा भिडभाड र सवारीसाधनको चाप बढेको छ । यता ट्राफिक प्रहरीले निषेधाज्ञा लुज भएपछि सवारी चाप बढेको बताएको छ । काठमाडौं उपत्यकामा आजदेखि निषेधाज्ञा अघिल्लो पटकभन्दा केही खुकुलो बनाइएको छ । यसकै मौका छोपी काठमाडौं उपत्यकाका सडकमा नागरिकले चहलपहल बढी देखिएको ट्राफिक प्रहरीले जनाएकाे छ ।

आजदेखि होटल, रेष्टुराँहरुलाई टेकअवे सेवा सन्चालन गर्न अनुमति दिइएको छ भने तरकारी तथा खाद्यान्न पसल खुल्ने समय पनि बिहान ११ बजेसम्मका लागि बढाइएको छ । औषधि, तरकारी, फलफूल, खाद्यान्न, दूध डेरी, मासु, खानेपानी, ग्याँस पसल, किराना पसल, डिपार्टमेन्टल (ग्रोसरी) खोल्न पाइने भएपछि नागरिकको चहलपहल पनि बढेको हो ।

आजैदेखि सरकारले नयाँ शैक्षिक सत्रको भर्नासमेत खुला गरेकोले पनि नागरिक चहलपहलसहित सवारी साधनको चाप बढेको छ । उपत्यका मुख्य सडक र चोकमा कोरोना बिर्साउने गरी ट्राफिक जामसमेत भएको छ ।