गण्डकी प्रदेश सरकारले शुक्रबार विश्वासको मत लिने

२ असार, काठमाडौं । गण्डकी प्रदेश सरकारले असार ४ गते विश्वासको मत लिने भएको छ । नेपाली कांग्रेस संसदीय दलका नेता कृष्णचन्द्र नेपालीले चार दिनअघि मात्रै गठबन्धन सरकार बनाएका हुन् ।

नेकपा एमाले नेता पृथ्वी सुब्बा गुरुङ नेतृत्वको सरकारले प्रदेशसभामा विश्वासको मत लिन नसकेपछि नेपाली कांग्रेसका नेता नेपालीको नेतृत्वमा विपक्षीहरुको गठबन्धनले सरकार बनाएको छ ।

हिजो मात्रै सरकारले नयाँ आर्थिक वर्षको बजेट ल्याएको छ । बजेटमाथिको छलफल र पास हुने क्रम अगावै सरकारले विश्वासको मत लिने भएको हो । सरकार बनेको ३० दिन भित्र प्रदेशसभामा विश्वासको मत लिनुपर्ने संवैधानिक व्यवस्था छ ।

कदाचित नेपाली नेतृत्वको सरकारले विश्वासको मत पाएन भने प्रदेशसभा भंग भई निर्वाचन गर्नुपर्ने हुन्छ । तर गठबन्धन सरकारसँग बहुमत भएकाले विश्वासको मत पाउने लगभग निश्चित छ ।